Qozog‘istonda “Imom AI” diniy ilovasi yaratiladi
Qozog‘istonda diniy-ma’rifiy sohada sun’iy intellektdan foydalanishga oid yangi loyiha muhokama qilinmoqda. Bu haqda Zamin.uz xabar berdi.
Qozog‘iston Musulmonlari diniy boshqarmasi diniy savollarga javob beruvchi “Imom AI” nomli mobil ilova ishlab chiqishni rejalashtirayotganini ma’lum qildi. Bu haqda Orda.kz nashri xabar berdi.
Qozog‘iston Oliy muftiysi Nauryzbay hoji Taganuli ushbu loyiha 2026 yilda ishga tushirilishi kutilayotganini ta’kidladi. Ma’lumotlarga ko‘ra, “Imom AI” ilovasi ishonchli diniy manbalarga asoslanib, foydalanuvchilarning murojaatlariga tezkor va aniq javob berish imkoniyatini taqdim etadi.
Mazkur loyiha zamonaviy dunyoda diniy sohada raqamli texnologiyalarni joriy etish zaruriyatidan kelib chiqqan. U fuqarolarga diniy masalalarda qulay va ishonchli ma’lumot olishni osonlashtirishi, shu bilan birga imomlar va ruhoniylar zimmasidagi kundalik ish yuklamasini kamaytirishi mumkin.
Shuningdek, Qozog‘iston Prezidenti Qosim-Jomart To‘qayev Yangi yil munosabati bilan qilgan murojaatida 2026 yilni raqamlashtirish va sun’iy intellekt infratuzilmasini rivojlantirish yili deb e’lon qilgan edi. Prezidentning fikricha, ilg‘or texnologiyalar mamlakatning turli sohalardagi salohiyatini oshirishga xizmat qiladi.
Qayd etish joiz, avvalroq O‘zbekiston Musulmonlari idorasi ham sun’iy intellektdan diniy masalalar bo‘yicha foydalanishga nisbatan o‘z munosabatini bildirgan edi.
