Qozog‘istonda "Imom AI" ilovasi ishga tushiriladi
Qozog‘istonda diniy-ma’rifiy sohada sun’iy intellekt texnologiyalarini joriy etish rejalashtirilmoqda. Bu haqda Zamin.uz xabar berdi.
Qozog‘iston Musulmonlari diniy boshqarmasi tomonidan sun’iy intellekt asosida ishlaydigan “Imom AI” nomli mobil ilovani ishlab chiqish ustida ish olib borilayotgani ma’lum qilindi. Ushbu loyiha 2026 yilda ishga tushirilishi kutilmoqda.
Bu haqda Orda.kz nashri xabar bergan. Qozog‘iston Oliy muftiysi Nauryzbay hoji Taganuli bergan ma’lumotga ko‘ra, “Imom AI” foydalanuvchilarning diniy savollariga tezkor va aniq javoblar berishga mo‘ljallangan.
Ilova ishonchli diniy manbalar asosida ishlaydi va zamonaviy talablarni inobatga olgan holda ishlab chiqilmoqda. Ushbu loyiha fuqarolarga diniy masalalar bo‘yicha qulay va ishonchli xizmat ko‘rsatishni maqsad qilgan.
Shuningdek, bu yangi texnologiya imomlar va ruhoniylar zimmasidagi ish yukini kamaytirishga yordam beradi. Qozog‘iston Prezidenti Qosim-Jomart Toqayev 2026 yilni Raqamlashtirish va sun’iy intellekt infratuzilmasini rivojlantirish yili deb e’lon qilgan edi.
Prezidentning ta’kidlashicha, ilg‘or texnologiyalarni joriy etish mamlakatning barcha sohalardagi salohiyatini oshirishga xizmat qiladi. Eslatib o‘tamiz, avvalroq O‘zbekiston Musulmonlar idorasi sun’iy intellektdan diniy masalalar bo‘yicha savol so‘rash joiz emasligini bildirgan edi.
