Suriyada kurd tiliga davlat tili maqomi berildi
Suriya Prezidenti Ahmad al-Shara’a kurd xalqining huquq va manfaatlarini himoya qilishga qaratilgan muhim farmonni imzoladi. Bu haqda Zamin.uz xabar berdi.
Ushbu farmon asosida kurdlar Suriya jamiyatining ajralmas qismi sifatida tan olindi va tarixda ilk bor kurd tiliga davlat tili maqomi berildi. Xalqaro AFP agentligining xabariga ko‘ra, farmonga binoan kurd tili aholining salmoqli qismini tashkil etadigan hududlardagi ta’lim muassasalarida o‘qitiladi.
Bundan tashqari, 1962 yilgi aholini ro‘yxatga olish jarayonida fuqarolikdan mahrum etilgan kurdlarga o‘z fuqaroligini qayta tiklash imkoniyati yaratildi. Bu qaror yillar davomida yechimini topmay kelgan muammolardan biri edi.
Shuningdek, 21 mart kuni nishonlanadigan Navro‘z bayrami rasmiy davlat bayrami sifatida e’tirof etildi. Bu qaror kurd xalqining madaniy merosini va milliy qadriyatlarini hurmat qilishga qaratilgan muhim qadam sifatida baholanmoqda.
Prezident Ahmad al-Shara’a televideniye orqali qilgan murojaatida kurd xalqini mamlakat taraqqiyoti va kelajagini barpo etish yo‘lida faol ishtirok etishga chaqirdi. U o‘z so‘zida: “Men kurd birodarlarimizni ushbu millatni rivojlantirishda faol ishtirok etishga chorlayman”, — deya ta’kidladi.
