O‘pka saratoni tashxisi qo‘yilgan bemor 40 yil yashadi
Gretsiyalik Stamatis Moraitisning hayoti tibbiyot olamida noyob hodisalardan biri sifatida e’tirof etilmoqda. Bu haqda Zamin.uz xabar berdi.
U o‘pka saratonining yakuniy bosqichida bo‘lishiga qaramay, taxminan 40 yil umr ko‘rgan. Ushbu voqea haqida xorijiy OAVlar, jumladan, “Daily Express” xabar berdi.
Ma’lumotlarga ko‘ra, Stamatis Moraitis AQShda yashagan va unga qariyb 40 yil avval o‘pka saratoni tashxisi qo‘yilgan. Shifokorlar uning umri bir necha oydan oshmasligini aytishgan, ammo bu bashorat amalga oshmadi.
Tashxisdan so‘ng, u davolanishni davom ettirish o‘rniga, vataniga — aholisi uzoq umr ko‘rishi bilan mashhur Ikariya oroliga qaytishga qaror qildi. U yerda u tinch va xotirjam hayot kechira boshladi.
Ikariyada u tabiat bag‘rida yashab, sabzavot yetishtirdi, uzumzorlarni parvarish qildi va ko‘p vaqtini yaqinlari bilan o‘tkazdi. Stress, shoshilish va asabiylik uning hayotidan butkul yo‘qoldi.
Moraitisning sog‘ligi asta-sekin yaxshilandi. Yillar o‘tib, u AQShga qaytib, sog‘lig‘idagi o‘zgarish sabablarini aniqlashni xohladi.
Ammo u yerga borgach, unga tashxis qo‘ygan shifokorlar allaqachon vafot etganini bilgan. Tadqiqotchilar bu voqeani o‘rganishga kirishdi.
“National Geographic” eksperti Den Byutnerning fikricha, Moraitisning uzoq umr ko‘rishiga asosiy sabab stressning kamayishi, tabiiy ovqatlanish va xotirjam hayot tarzi bo‘lgan. Ushbu voqea sog‘lom turmush tarzi va ichki xotirjamlik inson salomatligi uchun qanchalik muhim ekanini yana bir bor tasdiqlaydi.
