Xitoyda tug‘ilish darajasi rekord darajada pasaydi
Xitoyda 2025-yilda tug‘ilish darajasi rekord darajada pasayib ketdi. Bu haqda Zamin.uz xabar berdi.
Statistik ma’lumotlarga ko‘ra, har 1 000 kishiga atigi 5,63 nafar chaqaloq tug‘ilgan. Shu bilan birga, o‘lim ko‘rsatkichi ham oshib, har 1 000 kishiga 8,04 nafar o‘lim qayd etilgan.
Natijada, Xitoy aholisi 3,39 millionga kamayib, jami 1,4 milliard kishiga yetgan. Mamlakat hukumatining aholi kamayishini oldini olishga qaratilgan choralari davom etmoqda.
2016-yilda “bir bola” siyosati bekor qilinib, dastlab ikki, keyin uch nafar farzand ko‘rishga ruxsat berildi. Keyinchalik, 3 yoshgacha bo‘lgan har bir bola uchun moddiy yordam va ayrim hududlarda qo‘shimcha bonuslar joriy qilindi.
Biroq, yosh oilalar uchun farzand tarbiyasi bilan bog‘liq xarajatlarning yuqoriligi va iqtisodiy barqarorlikka bo‘lgan ehtiyoj sababli ko‘pchilik farzandli bo‘lishni kechiktirmoqda. Mutaxassislar fikricha, bu qarorlar asosan ijtimoiy va iqtisodiy sharoitlar bilan bog‘liq.
Aholi kamayishi mamlakat iqtisodiyotiga ham salbiy ta’sir ko‘rsatishi mumkin. Ishchi kuchi kamayishi, iste’molchilar sonining qisqarishi va pensiya tizimiga tushadigan bosimning oshishi kutilmoqda.
Shu sababli, hukumat aholi siyosatini kuchaytirish va yoshlarni oilaviy hayotga rag‘batlantirish bo‘yicha sa’y-harakatlarini davom ettirmoqda.
