Ilon Mask OpenAI va Microsoft’dan 134 milliard dollar talab qildi
Ilon Mask OpenAI va Microsoft kompaniyalaridan 134 milliard dollar miqdorida zarar to‘lashni talab qilib, sudga murojaat qildi. Bu haqda Zamin.uz xabar berdi.
Maskning advokati Stiven Molo tomonidan bildirilgan da’volarga ko‘ra, tadbirkor OpenAI loyihasining boshlang‘ich bosqichida katta moliyaviy hissa qo‘shgan va uning rivojlanishida muhim rol o‘ynagan. Shu sababli Mask OpenAI va Microsoft’ni noqonuniy yo‘l bilan foyda olishda ayblab, ulardan kompensatsiya undirishni talab qilmoqda.
Manbalarda aytilishicha, Mask OpenAI’dan 65,5 milliarddan 109,4 milliard dollargacha, Microsoft’dan esa 13,3 milliarddan 25,1 milliard dollargacha zarar undirishni so‘ragan. Ushbu ish bo‘yicha sud jarayoni Kaliforniya shtatining Oklend shahrida, aprel oyida hakamlar hay’ati ishtirokida boshlanishi kutilmoqda.
OpenAI Maskning da’volarini jiddiy qabul qilmayotganini va bu masalani shaxsiy “ta’qib kampaniyasi” deb atayotganini ma’lum qilgan. Microsoft esa mazkur masala yuzasidan hozircha izoh bermagan.
Eslatib o‘tamiz, Ilon Mask 2018 yilda OpenAI’dan chiqib, hozirda xAI deb nomlangan boshqa sun’iy intellekt loyihasini rivojlantirmoqda. Ushbu masala texnologiya sohasida katta muhokamalarga sabab bo‘lmoqda va “Sun’iy intellekt missiyaga xizmat qilishi kerakmi yoki biznes manfaatlariga?” degan savolni kun tartibiga olib chiqmoqda.
