Shavkat Mirziyoyev va ETTB prezidenti hamkorlikni muhokama qildi
O‘zbekiston Respublikasi Prezidenti Shavkat Mirziyoyev Davos shahrida o‘tayotgan Jahon iqtisodiy forumi doirasida Yevropa tiklanish va taraqqiyot banki (ETTB) prezidenti Odil Reno-Basso bilan uchrashuv o‘tkazdi. Bu haqda Zamin.uz xabar berdi.
Uchrashuv davomida tomonlar strategik hamkorlikni kengaytirish masalalarini muhokama qildi. Shuningdek, O‘zbekistonning bank bilan Markaziy Osiyodagi eng yirik hamkorga aylangani alohida ta’kidlandi.
Uchrashuvda ETTB tomonidan O‘zbekiston iqtisodiyotiga kiritilgan sarmoyalar hajmi deyarli 7 milliard dollarga yetgani qayd etildi. Bankning faoliyati yildan-yilga oshib borayotgani, 2025 yilga kelib operatsiyalar hajmi 1 milliard dollardan oshgani aytib o‘tildi.
Ushbu mablag‘larning katta qismi xususiy sektorni qo‘llab-quvvatlashga yo‘naltirilgani va tadbirkorlik rivojiga ijobiy ta’sir ko‘rsatgani ta’kidlandi. Prezident Shavkat Mirziyoyev ETTBning transport infratuzilmasini modernizatsiya qilish, “yashil” energetika dasturlarini ilgari surish hamda moliya bozorini isloh qilishdagi faoliyatini yuqori baholadi.
Bankning ekologik tashabbuslarni qo‘llab-quvvatlash va xususiy biznesni moliyalashtirishdagi roli ham e’tirof etildi. Kelgusi yil uchun hamkorlikning asosiy yo‘nalishlari belgilandi.
Xususan, xususiy sektorni rivojlantirish, hududiy infratuzilmani yangilash, temir yo‘l transportini raqamlashtirish (“aqlli temir yo‘llar” loyihasi) va innovatsion startaplarni qo‘llab-quvvatlash masalalari muhim vazifalar sifatida ko‘rsatildi. Muzokaralarda ijtimoiy kapitalni rivojlantirish masalasi ham muhim o‘rin egalladi.
Ayollar va yoshlarni zamonaviy kasblarga o‘rgatish dasturlarini davom ettirishga kelishildi. Ushbu tashabbuslar ularni raqamli iqtisodiyotga moslashtirish va ayol tadbirkorlarning biznes yuritish ko‘nikmalarini mustahkamlashga xizmat qilishi qayd etildi.
Uchrashuv yakunida 2026 yilga qadar yangi yuqori texnologiyali loyihalarni amalga oshirish orqali O‘zbekistonning mintaqadagi iqtisodiy yetakchilik mavqeini yanada mustahkamlashga ishonch bildirildi. Shuningdek, avvalroq Prezident Shavkat Mirziyoyev Davosda BlackRock kompaniyasi rahbariyati bilan uchrashib, ushbu xalqaro investitsiya fondining O‘zbekiston iqtisodiyotidagi ishtirokini kengaytirish masalalarini muhokama qilgani xabar qilingan edi.
