Mushugi tufayli ishdan bo‘shatilgan erkak sudda g‘alaba qozondi
Finlyandiyada bir erkak uy mushugini yo‘qotgani sababli vaqtincha mehnatga layoqatsizlik varaqasi olgani bilan bog‘liq voqea jamoatchilikning diqqatini tortdi. Bu haqda Zamin.uz xabar berdi.
Ma’lumotlarga ko‘ra, mushuk og‘ir kasallikka chalingan va uni evtanaziya qilishga to‘g‘ri kelgan. Mushukning o‘limi erkak uchun ruhiy zarba bo‘lgani sabab u ish joyiga kasallik varaqasini topshirgan va tibbiy ma’lumotnoma taqdim etgan.
Biroq ish beruvchi bu holatni “uzrli sabab” sifatida qabul qilmagan. Korxona rahbariyati hujjatlarni rad etib, xodimga “yo ishga qayt, yo ariza yoz” talabini qo‘ygan.
Erkak bosim ostida ishga qaytishga majbur bo‘lgan, ammo keyinchalik “uzrli sabablarisiz ishga kelmagan” degan vaj bilan ishdan bo‘shatilgan. Shundan so‘ng, u Tampere shahridagi tuman sudiga murojaat qilgan.
Sud xodimning foydasiga qaror chiqargan va korxonani unga 40 ming yevrodan ortiq mablag‘ to‘lashga majbur qilgan. Ushbu summa kompensatsiya, kasallik davri uchun to‘lov hamda sud jarayoniga ketgan xarajatlarni o‘z ichiga olgan.
Afsuski, erkak sud qarori e’lon qilinishidan oldin vafot etgan. Sud mablag‘ni uning meros tarkibiga kiritish haqida qaror chiqargan.
