Sobiq general-mayor Rateb G‘anemiy hibsga olindi

Suriya Ichki ishlar vazirligi ma’lumotiga ko‘ra, Hasaka viloyati yaqinida qo‘shma operatsiya o‘tkazildi. Bu haqda Zamin.uz xabar berdi.

Ushbu operatsiya Ichki xavfsizlik qo‘mondonligi Terrorizmga qarshi kurash boshqarmasi bilan hamkorlikda amalga oshirilgan. Natijada, 2010–2014 yillarda Harbiy xavfsizlik boshqarmasi boshlig‘i o‘rinbosari lavozimida ishlagan sobiq general-mayor Rateb Ali G‘anemiy hibsga olindi.

Bu haqda SANA davlat axborot agentligi xabar berdi. Vazirlikning xabariga ko‘ra, dastlabki tekshiruvlar G‘anemiyning bir nechta yuqori darajadagi xavfsizlik lavozimlarida ishlaganini tasdiqlagan.

U avval Hasaka shahridagi Harbiy xavfsizlik bo‘limiga rahbarlik qilgan, so‘ngra Sa’sa bo‘limi rahbari o‘rinbosari bo‘lgan. Ushbu lavozimlarga u Bashar al-Asad tomonidan tayinlangan.

Vazirlikning qo‘shimcha qilishicha, G‘anemiy o‘sha davrda fuqarolarni hibsga olish, namoyishlarni bostirish va inson huquqlarini buzish bilan bog‘liq repressiv choralarni amalga oshirishda ishtirok etganlikda gumon qilinmoqda. Ushbu harakatlar natijasida fuqarolarning asosiy huquqlari qo‘pol ravishda buzilgani ta’kidlangan.

Shuningdek, Asad rejimi ag‘darilganidan keyin G‘anemiy kurdlarning YPG yoki SDF qurolli guruhlariga qo‘shilgan bo‘lishi mumkinligi taxmin qilinmoqda.