Rossiya Hindiston va Bangladeshdan ishchilarni ko‘paytirdi
Rossiya hukumati 2025 yilda Hindiston va Bangladesh fuqarolariga ishlash uchun rekord darajada ko‘p ruxsatnoma berdi. Bu haqda Zamin.uz xabar berdi.
Rasmiy ma’lumotlarga ko‘ra, bu ko‘rsatkich so‘nggi to‘qqiz yil ichidagi eng yuqori natijani tashkil etadi. Mutaxassislarning prognozlariga ko‘ra, 2030 yilga kelib Rossiyada ishchi kuchi yetishmovchiligi 3 million kishidan oshishi mumkin.
Bu holat mehnat migratsiyasiga bo‘lgan talabni sezilarli darajada kuchaytirmoqda. Xususan, 2025 yilda Rossiyada ishlash uchun 56,5 ming nafar Hindiston fuqarosiga taklif yuborildi.
Taqqoslash uchun, 2024 yilda bu ko‘rsatkich 36,2 ming nafarni tashkil etgan edi. Shuningdek, Bangladeshdan kelayotgan mehnat migrantlari soni ham sezilarli oshgan.
Agar 2024 yilda bu raqam 2,8 ming kishini tashkil qilgan bo‘lsa, joriy yilda 9,3 ming nafarga yetdi. Ma’lum qilinishicha, Hindiston va Bangladeshdan kelayotgan migrantlar soni bo‘yicha ko‘rsatkichlar so‘nggi to‘qqiz yil ichida eng yuqori darajaga chiqdi.
Bu esa Rossiyada mehnat bozoridagi ehtiyojning ortib borayotganini ko‘rsatmoqda.
