Mushugi uchun sudlashgan erkakka 40 ming yevro to‘landi
Finlyandiyada bir erkak o‘z mushugining o‘limi sababli vaqtincha mehnatga layoqatsizlik varaqasini olgan. Bu haqda Zamin.uz xabar berdi.
Ushbu holat jamiyatda turli munozaralarga sabab bo‘ldi. Ayrimlar buni ruhiy zarba va tabiiy qayg‘u deb qabul qilsa, boshqalar ish intizomini ustuvor deb hisoblashdi.
Mushuk og‘ir kasallikka chalingani bois evtanaziya qilinishiga to‘g‘ri kelgan. Erkak ushbu voqeadan so‘ng ish joyiga kasallik varaqasi va tibbiy ma’lumotnoma taqdim etgan.
Ammo ish beruvchi bu hujjatlarni jiddiy sabab sifatida qabul qilmagan. Natijada rahbari unga ishga qaytish yoki ishdan bo‘shashni tanlashni taklif qilgan.
Qo‘rquv sabab erkak ishga qaytgan bo‘lsa-da, keyinchalik “uzrli sababsiz ishga kelmaslik” asosida ishdan bo‘shatilgan. Shundan so‘ng erkak Tampere shahridagi tuman sudiga murojaat qilgan.
Sud uning foydasiga qaror chiqargan va ish beruvchini 40 ming yevrodan ortiq mablag‘ to‘lashga majbur qilgan. Bu summa ishchi uchun kompensatsiya, kasallik davri uchun to‘lov va sud xarajatlarini o‘z ichiga olgan.
Afsuski, erkak sud qarori e’lon qilinishidan avval vafot etgan. Natijada sud ushbu mablag‘ni uning meros tarkibiga kiritish haqida qaror chiqargan.
