Moskva: Markaziy Osiyo bilan hamkorlik masalalari muhokama qilindi
22-yanvar kuni Moskva shahrida "Markaziy Osiyo – Rossiya" formatidagi maslahatlashuvlar bo‘lib o‘tdi. Bu haqda Zamin.uz xabar berdi.
Uchrashuvda amaliy hamkorlik masalalari va 2025–2027 yillarga mo‘ljallangan qo‘shma harakatlar rejasini amalga oshirish jarayoni muhokama qilindi. Ushbu reja 2025-yil 9-oktabr kuni Dushanbeda o‘tkazilgan ikkinchi "Markaziy Osiyo – Rossiya" sammiti yakunida tasdiqlangan edi.
Maslahatlashuvlarda Rossiya tashqi ishlar vaziri o‘rinbosari Mixail Galuzin, Qozog‘iston tashqi ishlar vaziri o‘rinbosari Ermuhambet Konuspoyev, Qirg‘iziston tashqi ishlar vaziri o‘rinbosari Alma Imangaziyev, O‘zbekiston tashqi ishlar vaziri o‘rinbosari Bobur Usmonov, Tojikistonning Rossiyadagi elchisi Davlatshoh Gulmahmadzoda, Turkmanistonning Rossiyadagi elchisi Esen Aydog‘diyev va boshqa mas’ul vakillar ishtirok etdi. Uchrashuv davomida sammit chog‘ida Markaziy Osiyo davlatlari rahbarlari tomonidan ilgari surilgan tashabbuslar yuzasidan fikr almashildi.
Shuningdek, tomonlar qo‘shma rejani tizimli amalga oshirish mexanizmlarini ko‘rib chiqdi. Muzokaralarda savdo-iqtisodiyot, transport va logistika, energetika, tibbiyot, madaniy-gumanitar aloqalar va ekologiya sohalaridagi hamkorlik masalalariga alohida e’tibor qaratildi.
Muzokaralar do‘stona va konstruktiv muhitda o‘tgani ta’kidlandi. Maslahatlashuvlar yakunida Rossiya Energetika vazirligi huzurida Markaziy Osiyo davlatlari bilan energetika masalalari bo‘yicha ishchi guruh tuzishga kelishildi.
Rossiya energetika vaziri o‘rinbosari Roman Marshavin mazkur ishchi guruh yoqilg‘i-energetika majmuasidagi hamkorlikni rivojlantirish va davlat rahbarlari tasdiqlagan harakatlar rejasini amalga oshirishga xizmat qilishini bildirdi.
