Xitoy armiyasida korrupsiyaga qarshi kurash kuchaymoqda

Xitoy Xalq-ozodlik armiyasida korrupsiyaga qarshi kurash kuchaymoqda. Bu haqda Zamin.uz xabar berdi.

So‘nggi ma’lumotlarga ko‘ra, Markaziy harbiy kengash raisi o‘rinbosari Chjan Yusya va kengash qo‘shma shtabi boshlig‘i general Lyu Chjenli tergovga tortilgan. Ular “intizom va qonun buzilishi” gumonida tekshirilmoqda.

Rasmiy bayonotlarda ayblov tafsilotlari ochiqlanmagan, biroq xalqaro manbalarga ko‘ra, bunday iboralar odatda korrupsiyaga ishora qiladi. Chjan Yusya 75 yoshda bo‘lib, mamlakatning eng yuqori lavozimli harbiy rahbarlaridan biri hisoblanadi.

U Xitoy Kommunistik partiyasi siyosiy byurosi a’zosi hamdir. Agar u lavozimidan chetlatilsa, bu Xitoy armiyasidagi so‘nggi yillardagi eng yirik o‘zgarishlardan biri bo‘ladi.

Ayrim kuzatuvchilar bu jarayonni davlat rahbari Si Jinpingning hokimiyatni yanada kuchaytirish harakati sifatida baholamoqda. Mazkur voqealar Xitoyning ichki siyosiy muhitidan tashqari, xalqaro maydonda ham katta e’tiborni tortmoqda.

Xususan, Tayvan rasmiylari bu o‘zgarishlarni mintaqaviy xavfsizlikka ta’sir qilishi mumkin bo‘lgan omil sifatida ko‘rib, diqqat bilan kuzatmoqda. Hozircha tergovning aniq natijalari ochiqlanmagan.

Biroq bu jarayon Xitoy armiyasidagi “katta tozalash” sifatida baholanmoqda va nafaqat ichki elita, balki tashqi kuchlarga ham jiddiy signal bo‘lib xizmat qilayotgani aytilmoqda. Shu bois, kelgusi o‘zgarishlar yanada e’tiborda bo‘lishi kutilmoqda.