Tojikiston chegarasida kontrabandachilar yo‘q qilindi
Tojikiston chegarachilari Afg‘oniston tomondan noqonuniy tarzda chegarani kesib o‘tgan va qurolli qarshilik ko‘rsatgan uch nafar kontrabandachini zararsizlantirganini ma’lum qildi. Bu haqda Zamin.uz xabar berdi.
Bu haqda podrobno.uz xabar berdi. Davlat milliy xavfsizlik qo‘mitasi Chegara qo‘shinlari matbuot xizmatining xabariga ko‘ra, hodisa 29-yanvar kuni kechqurun Shamsiddin Shohin tumanida joylashgan 0341-harbiy qismning “Bahorak” chegara zastavasi yaqinida sodir bo‘lgan.
Badahshon viloyati tomoni orqali besh nafar afg‘on fuqarosi noqonuniy ravishda chegarani buzib o‘tgan. Ular ortga qaytishga uringan paytda chegarachilar naryadiga qarata o‘t ochgan.
Javob otishmasi natijasida uch nafar huquqbuzar yo‘q qilingan, ikki nafari esa Afg‘oniston hududiga qochib ketgan. Hodisa joyida halok bo‘lganlarning jasadlari, uchta Kalashnikov avtomati, to‘rtta magazin, 150 dona o‘q-dori, qayiq hamda giyohvand moddalar – gashish va opiy solingan katta o‘ramlar topilgan.
Chegara qo‘shinlari davlat chegarasini himoya qilish va kontrabanda bilan bog‘liq qonunbuzarliklarga chek qo‘yish choralarini davom ettirayotgani, vaziyat nazoratda ekanini ma’lum qildi. Ushbu holat bo‘yicha tergov ishlari olib borilmoqda.
Hodisa yuzasidan bir nechta jinoyat ishlari qo‘zg‘atilgan. Ular orasida giyohvandlik vositalarining noqonuniy muomalasi, kontrabanda, davlat chegarasini noqonuniy kesib o‘tish va qurol saqlash kabi moddalar mavjud.
Eslatib o‘tamiz, avvalroq ham Tojikiston–Afg‘oniston chegarasida qurolli hujumning oldi olingani haqida xabar berilgandi. O‘sha vaqtda terrorchi guruhning uch a’zosi Tojikiston hududiga kirishga uringan va maxsus amaliyot davomida yo‘q qilingan.
