ADAC prezidenti Hillebrand iste’foga chiqdi
Germaniyadagi eng yirik avtomobil klublaridan biri bo‘lgan ADACning transport masalalari bo‘yicha prezidenti Gerhard Hillebrand iste’foga chiqdi. Bu haqda Zamin.uz xabar berdi.
Bu holat uning Neue Osnabrücker Zeitung gazetasiga bergan intervyusidan so‘ng kelib chiqqan ommaviy norozilik sababli yuzaga keldi. Bu haqda Bild nashri xabar berdi.
Hillebrand intervyusida ekologik toza transport vositalariga o‘tishni rag‘batlantirish uchun benzin narxini oshirish zarurligini ta’kidlagan edi. Unga ko‘ra, odamlar dizel va benzinli avtomobillardan elektromobillarga o‘tishi uchun qat’iy choralar ko‘rish lozim.
Biroq, uning bu taklifi klub a’zolari orasida keskin qarshilikka sabab bo‘ldi. Rasmiy ma’lumotlarga ko‘ra, so‘nggi to‘rt hafta davomida 60 mingga yaqin a’zo klubni tark etgan.
Bu holat ADAC tarixida kamdan-kam uchraydigan norozilik sifatida baholanmoqda. Klub rahbariyati Hillebrandning fikrlari tashkilotning rasmiy nuqtayi nazarini aks ettirmasligini ma’lum qildi.
Ularning ta’kidlashicha, ADAC har doim hamyonbop transport tarafdori bo‘lib qoladi va aholiga qo‘shimcha moliyaviy yuklamalar yuklashga qarshi. Shuningdek, klub Hillebrandning bayonoti ko‘pchilik tomonidan “avtomobilchilarning manfaatlarini himoya qilishdan voz kechish” sifatida qabul qilinganini tan oldi va bu masala bo‘yicha tegishli xulosa chiqarilishini va’da qildi.
Eslatib o‘tamiz, ADAC Germaniyada 22 millionga yaqin a’zoga ega bo‘lgan yirik avtomobilchilar klubi hisoblanadi.
