Tramp: Eron bilan kelishuv bo‘lmasa, oqibatlar jiddiy bo‘ladi
AQSh prezidenti Donald Tramp Eron bilan olib borilayotgan muzokaralar muvaffaqiyatli yakunlanmasa, Tehronni jiddiy oqibatlar kutishi mumkinligini ta’kidladi. Bu haqda Zamin.uz xabar berdi.
Trampning so‘zlariga ko‘ra, AQShning Eron yo‘nalishidagi harbiy imkoniyatlari juda katta va Amerika bu borada boshqa hududlardagi holatlarga qaraganda ancha ustun kuchga ega. Prezident Tramp: "Eron bo‘yicha qanday qaror qabul qilishimni hozircha ayta olmayman.
Biz mintaqada juda katta harbiy salohiyatga egamiz va bu kuchlar juda tez orada o‘z vazifasini bajarishga tayyor bo‘ladi. Agar kelishuvga erishsak, bu, albatta, yaxshi natija bo‘ladi.
Ammo agar kelishuv amalga oshmasa, yomon oqibatlar yuzaga kelishi mumkin. Gap yadroviy qurollar haqida bormoqda.
Bizda eng zamonaviy va eng yirik harbiy kemalar mavjud. Voqealar rivojini kuzatamiz", — deya ta’kidlagan.
Shuningdek, Tramp AQShning ulkan harbiy kuchlari yaqin vaqt ichida Eron tomon yo‘l olishini va mintaqada paydo bo‘lishini ham qo‘shimcha qildi. Unga ko‘ra, muzokaralar davom etmoqda va AQSh mintaqadagi vaziyatni diqqat bilan kuzatmoqda.
