Ufa shahridagi maktabda qurolli hodisa sodir bo‘ldi
Rossiyaning Ufa shahrida joylashgan 16-sonli shahar gimnaziyasida qurolli hodisa sodir bo‘lgani haqida xabar berildi. Bu haqda Zamin.uz xabar berdi.
Dastlabki ma’lumotlarga ko‘ra, to‘qqizinchi sinf o‘quvchisi plastik pnevmatik qurol va petarda bilan ta’lim muassasasiga kirib, dars vaqtida o‘qituvchi hamda uch nafar sinfdoshiga o‘q uzgan. Shuningdek, portlashga o‘xshash tovush eshitilgani ham qayd etilgan.
Voqea mahalliy vaqt bilan soat 11:00 atrofida yuz bergan. Hodisa joyiga politsiya, Rossiya Milliy gvardiyasi va favqulodda xizmatlar tezkor yetib borishgan.
Maktab hududi nazoratga olinib, kirish-chiqish vaqtincha cheklangan. Boshqirdiston hukumati rahbari o‘rinbosari Ural Kilsenbayevning so‘zlariga ko‘ra, hodisa oqibatida hech kim tan jarohati olmagan.
Gumon qilinayotgan o‘quvchi esa huquqni muhofaza qilish organlari tomonidan qo‘lga olingan. Mazkur holat yuzasidan tergov organlari tomonidan bir nechta jinoiy ishlar ochilgan.
Jumladan, mansabdor shaxslarning beparvoligi bilan bog‘liq moddalar asosida surishtiruv ishlari olib borilmoqda. Eslatib o‘tamiz, bundan avval dekabr oyida Moskva viloyatining Odintsovo tumanida ham shunga o‘xshash hodisa sodir bo‘lgandi.
O‘sha voqeada qurollangan o‘quvchi tojikistonlik bolaga hujum qilib, fojia bilan yakunlangan edi.
