Quyoshdagi kuchli chaqnashlar yerga xavf tug‘dirmoqda
2-fevral kuni NASA va AQSh kosmik ob-havo xizmatlari Quyoshdagi faollikning keskin kuchaygani haqida ogohlantirish berdi. Bu haqda Zamin.uz xabar berdi.
Ma’lumotlarga ko‘ra, Quyosh yuzasida tez kengayayotgan 4366-raqamli dog‘ shu kuni X toifasiga mansub to‘rtta kuchli chaqnashni keltirib chiqargan. Eng kuchli chaqnash 1-fevral oqshomida X8.1 darajasida qayd etilgan bo‘lib, bu 2024-yil oktabr oyidan beri eng yorqin chaqnash sifatida baholandi.
Mutaxassislarning fikricha, fevral oyining birinchi haftasida bunday chaqnashlar davom etishi mumkin. X toifasiga kiruvchi chaqnashlar radioaloqa, elektr tarmoqlari va navigatsiya tizimlariga salbiy ta’sir ko‘rsatishi, shuningdek, kosmik texnika va astronavtlar uchun xavf tug‘dirishi ehtimoli bor.
Ultrabinafsha va rentgen nurlari yuqori atmosferani ionlashtirgani sababli Janubiy Tinch okeanida R3 darajadagi radioaloqa uzilishlari kuzatilgan. Bundan tashqari, Avstraliyaning sharqi va Yangi Zelandiyada qisqa to‘lqinli aloqa tizimlarida muammolar yuzaga kelgan.
Shuningdek, chaqnashlar natijasida yuzaga kelgan plazma buluti 5-fevral atrofida Yerga yaqinlashishi kutilmoqda. Bu esa pastroq kengliklarda avroralarning paydo bo‘lishiga olib kelishi mumkin.
Mutaxassislar ushbu hodisalarni kuzatishda davom etmoqda.
