Trampning tinchlik rejasi yangi mojarolar xavfida
The Telegraph nashri sharhlovchisi Devid Blerning fikricha, Donald Trampning Ukrainaga doir “tinchlik formulasi” hali pishib yetilmagan va shoshma-shosharlik bilan ishlab chiqilgan. Bu haqda Zamin.uz xabar berdi.
Muallifning ta’kidlashicha, bunday mas’uliyatsiz yondashuv natijasida “tinchlik” deb ataladigan bitim amalda yangi mojarolar uchun zamin yaratishi mumkin. Blerning asosiy e’tirozi shuki, Vladimir Putin Ukrainadagi ba’zi hududlarni, jumladan, u to‘liq nazorat qila olmagan joylarni ham talab qilishi mumkin.
Ushbu hududlarda taxminan 200 mingga yaqin aholi yashaydi va ularning dushman qo‘liga topshirilishi xavfli ssenariy sifatida baholanmoqda. Muallifning yozishicha, aynan shu hududlarda Ukraina o‘zining eng kuchli mudofaa chizig‘ini qurib olgan.
Agar bu pozitsiyalar osongina berib qo‘yilsa, keyinchalik boshqa hududlarga kirib borish yanada osonlashishi va bosqinchilik ishtahasi kuchayishi mumkin. Eng yomon ssenariy sifatida Bler bunday kelishuvning Putinga kengroq harbiy harakatlar uchun vaqt va qulay sharoit yaratib berishini ko‘rsatadi.
Unga ko‘ra, hozirgi bitim kelajakdagi yangi urush uchun tanaffus sifatida xizmat qilishi ehtimoldan xoli emas. Blerning fikricha, haqiqiy tinchlikka erishishning yagona yo‘li — Putinni hududiy talablaridan voz kechishga majbur qilishdir.
Ammo hozirgi vaziyatda bosim asosan Putinga emas, aksincha, Ukraina prezidenti Volodimir Zelenskiyga qaratilmoqda. Shuningdek, maqolada Tramp va uning maslahatchisi Stiv Uitkoffning vositachi sifatida obro‘ to‘plashga intilishi xavfli oqibatlarga olib kelishi mumkinligi ta’kidlanadi.
Bunday sharoitda xavfsizlik kafolatlari yetarlicha mustahkam bo‘lmasligi va Putinning tanaffusdan keyin yana urush boshlash imkoniyatini saqlab qolishi ehtimoli bor. Xulosa sifatida, maqolada tinchlik bitimi haqidagi fikrlar shunday bayon etiladi: agar kelishuv faqat qog‘ozda qolib, amalda real kafolatlarga ega bo‘lmasa, u tinchlik emas, balki keyingi mojarolar oldidan vaqtinchalik tanaffus bo‘lib qoladi.
Shu sababdan, har qanday bitimning haqiqiy sinovi uning imzolangan kuni emas, balki undan keyingi davrda aniqlanadi.
