Aliyev va Pashinyan tinchlik muzokaralarini davom ettirdi
Abu-Dabi shahrida Ozarbayjon prezidenti Ilhom Aliyev va Armaniston bosh vaziri Nikol Pashinyan o‘rtasida uchrashuv bo‘lib o‘tdi. Bu haqda Zamin.uz xabar berdi.
Muzokaralarda ikki davlat o‘rtasidagi munosabatlarni normallashtirish va barqarorlikni ta’minlash masalalari muhokama qilindi. Rasmiy xabarga ko‘ra, tomonlar Vashingtonda AQSH prezidenti vositachiligida o‘tkazilgan tinchlik sammitida erishilgan kelishuvlarning ijrosi yuzasidan ijobiy o‘zgarishlarni qayd etdi.
Muzokaralarda asosiy urg‘u normallashtirish jarayonini izchil davom ettirishga qaratildi. Yetakchilar bu jarayonni faqat rasmiy kelishuvlar bilan cheklab qo‘ymasdan, doimiy muloqot va amaliy ishlar bilan qo‘llab-quvvatlash zarurligini ta’kidladi.
Tinchlik faqat qog‘ozda emas, hayotda seziladigan natijalar orqali mustahkamlanishi lozimligi qayd etildi. Ikki davlat o‘rtasida savdo aloqalari boshlangan.
Ozarbayjondan Armanistonga neft mahsulotlari yetkazib berilayotgani va uchinchi davlatlardan don hamda boshqa tovarlarning Ozarbayjon hududi orqali Armanistonga tranzit qilinayotgani mamnuniyat bilan tilga olindi. Tomonlar savdo-iqtisodiy hamkorlikni kengaytirish imkoniyatlarini o‘rganishga kelishib oldi.
Shuningdek, fuqarolik jamiyati vakillari o‘rtasidagi muloqotlarni faollashtirish masalasi ham muhokama qilindi. Bunday tashriflar odamlar o‘rtasidagi masofani qisqartirib, jamiyatlarning bir-birini yaxshiroq tushunishiga xizmat qilishi ta’kidlandi.
Tinchlik nafaqat siyosiy darajada, balki jamiyatlar o‘rtasidagi muloqot orqali ham mustahkamlanishi lozimligi qayd etildi. Uchrashuvda transport va kommunikatsiya sohasidagi loyihalar, shu jumladan TRIPP tashabbusi, muhokama qilindi.
Ushbu yo‘nalishdagi amaliy qadamlar kelishuvlarni hayotga tatbiq etishda muhim ahamiyatga ega ekanligi bildirildi. Uchrashuv yakunida Aliyev va Pashinyan tinchlik va barqarorlikni ta’minlash yo‘lida birgalikdagi sa’y-harakatlarni davom ettirishga tayyor ekanini yana bir bor tasdiqladi.
Tomonlar muloqotni uzmaslik va kelishuvlarni amalda bajarishni davom ettirishga kelishib oldi. Umuman olganda, muzokaralar konstruktiv ruhda o‘tib, tomonlar o‘zaro anglashuvni kuchaytirishga intilayotganini namoyon etdi.
