Norvegiya monarxiyasi kelajagi savol ostida qoldi
Norvegiya qirollik oilasi atrofida yana jiddiy mojarolar yuzaga keldi. Bu haqda Zamin.uz xabar berdi.
Taxt vorisi, valiahd shahzoda Xokonning rafiqasi kronprinsessa Mette-Maritning o‘g‘li Marius Borg Xyoybyu ustidan sud jarayoni boshlandi. Oslo politsiyasi tomonidan 1-fevral kuni qo‘lga olingan 28 yoshli Marius bir qator og‘ir jinoyatlarda, jumladan, jinsiy zo‘ravonlik va jismoniy jarohat yetkazishda ayblanmoqda.
Bu hodisalar mamlakatda monarxiya boshqaruvining kelajagi borasida qizg‘in bahslarni keltirib chiqardi. Marius Xyoybyu, Norvegiya valiahdining asrandi o‘g‘li bo‘lsa-da, qirollik oilasi a’zosi sifatida rasman tan olinmaydi.
Shunga qaramay, uning qilmishlari qirollik oilasining obro‘siga putur yetkazmoqda. Dastlab unga 32 banddan iborat ayblovlar ilgari surilgan bo‘lsa, keyinchalik bu ro‘yxat yana kengaytirildi.
Jabrlanuvchilar orasida taniqli shaxslar, jumladan, televideniye yulduzi Nora Xaukland ham bor. Bundan tashqari, Marius ilgari giyohvand moddalar saqlagani uchun jazolangan, so‘nggi hibs paytida esa uning qonida kokain va marixuana izlari topildi.
Sudda u jinsiy zo‘ravonlikka oid ayblovlarni rad etdi. Qirollik oilasidagi boshqa mojarolar ham e’tiborni tortmoqda.
AQShda oshkor qilingan Jeffri Epshteyn ishi bo‘yicha hujjatlarda Mette-Maritning bu shaxs bilan aloqalari fosh bo‘ldi. Malika Epshteynni maqtov bilan tilga olgan va undan o‘g‘li Mariusning masalalari bo‘yicha maslahat so‘ragani aniqlangan.
Keyinchalik Mette-Marit bu aloqalarni katta xato deb baholab, uzr so‘radi. Bu voqealar fonida monarxiyaning kelajagi savol ostida qolmoqda.
Mette-Marit o‘pka fibrozidan aziyat chekmoqda va unga yaqin kelajakda a’zo ko‘chirib o‘tkazish amaliyoti talab qilinishi mumkin. Shu bilan birga, mamlakatda monarxiyani yoqlovchi fuqarolar soni yildan yilga kamayib bormoqda.
2017-yilda qirollikni 81% aholi qo‘llab-quvvatlagan bo‘lsa, bugungi kunda bu ko‘rsatkich 61% ga tushib ketgan. Norvegiya parlamentida respublika tuzumiga o‘tish masalasi ham muhokama qilinmoqda.
Ammo deputatlarning aksariyati hali ham monarxiyani saqlab qolish tarafdori. Shunday bo‘lsa-da, qirollik oilasidagi shaxsiy xatolar va mojarolar xalq ishonchiga jiddiy zarar bermoqda.
Monarxiya boshqaruvidan voz kechish haqida fikrlar tobora kuchaymoqda.
