O‘zbekiston Qozog‘istondan 66 ming tonna go‘sht import qildi

Qozog‘istonda 2025 yilga oid bojxona ma’lumotlari e’lon qilindi. Bu haqda Zamin.uz xabar berdi.

Unga ko‘ra, O‘zbekistonga eksport qilingan 1 kilogramm mol go‘shti o‘rtacha 3 dollar atrofida sotilgan. Bu haqda mahalliy nashr “Cmn.kz” xabar berdi.

Raqamlarga ko‘ra, 2025 yilda O‘zbekiston Qozog‘istondan 66,1 ming tonna mol go‘shti va submahsulotlarni jami 189,9 million AQSH dollariga xarid qilgan. Bu o‘rtacha hisobda 1 kilogramm go‘sht uchun 2,87 dollardan to‘g‘ri keladi.

Shu bilan birga, Qozog‘iston ichki bozorida mol go‘shti narxi 30 foizdan oshib, 1 kilogrammi 4–4,5 ming tengega yetgan. Qozog‘iston Savdo va integratsiya vaziri o‘rinbosari Janel Kushukova mazkur raqamlarga shubha bilan qaragan.

U ichki va tashqi narxlar orasidagi katta tafovutni izohlab, bu ma’lumot texnik xatolik natijasi bo‘lishi mumkinligini ta’kidladi. “Go‘shtni davlat davlatga sotmaydi, balki ishlab chiqaruvchilar shartnoma asosida sotadi.

Agar ichki bozorda narx bir necha barobar yuqori bo‘lsa, mahsulotni 3 dollarga eksport qilish iqtisodiy jihatdan foydasiz”, – dedi u. Vazir o‘rinbosari ushbu masalani chuqur o‘rganish va zarur hollarda bojxona organlari bilan aniqlik kiritish lozimligini ta’kidladi.

Shuningdek, Savdo vazirligi Qozog‘istonda mol go‘shti narxlari oshib borayotganini tan oldi. Kushukovaning so‘zlariga ko‘ra, narxlarning o‘sishiga chorva sonini tiklash jarayonining uzoq davom etishi va O‘zbekistondan talabning keskin oshishi sabab bo‘lmoqda.

Mutaxassislarning fikriga ko‘ra, O‘zbekistonda so‘nggi yillarda go‘sht iste’moli sezilarli darajada oshgan. Ammo tabiiy va geografik cheklovlar sabab mamlakat o‘z ishlab chiqarish hajmini ushbu ehtiyoj darajasida kengaytira olmayapti.

Shu bois, importga bo‘lgan talab ortib bormoqda.