Bashar Asadning beparvoligi Suriya inqirozini chuqurlashtirdi
Suriya sobiq prezidenti Bashar Asadning hokimiyati qulash arafasida bo‘lgan davrda uning o‘z vazifalariga beparvoligi haqida yangi ma’lumotlar paydo bo‘ldi. Bu haqda Zamin.uz xabar berdi.
The Atlantic jurnali xabariga ko‘ra, shaharlar birin-ketin qo‘zg‘olonchilar qo‘liga o‘tayotgan, mamlakatda vaziyat og‘irlashayotgan bir paytda Asad telefonida o‘yin o‘ynab vaqt o‘tkazgan. Jurnalist Robert F.
Uortning yozishicha, prezidentning atrofidagilar uning bu xatti-harakatidan hayratda qolgan. Hatto yaqin maslahatchilar va xorijiy davlatlardan yordam takliflari bo‘lganiga qaramay, Asad mas’uliyatli qarorlar qabul qilishga shoshilmagan.
O‘sha vaqtda Rossiya, Turkiya va Eron Asad rejimini qo‘llab-quvvatlash uchun turli yordamlarni taklif qilgan, biroq Asad ularga javob bermagan. U mamlakatda og‘ir bo‘lib borayotgan vaziyatni nazorat qilish o‘rniga, o‘zini chetga olgan va o‘yinlarga mukkasidan ketgan.
Bu esa davlat boshqaruvidagi zaiflikni yanada kuchaytirgan. 2024 yil dekabr oyida qo‘zg‘olonchilar Damashqni egallab, hokimiyatni o‘z qo‘liga olganini e’lon qilishdi.
Bashar Asad esa oilasi bilan mamlakatni tark etib, Moskvaga yo‘l oldi. Rossiya unga boshpana taqdim etdi va Kreml bu qarorni “insonparvarlik nuqtayi nazaridan” qabul qilganini ma’lum qildi.
Mutaxassislarning fikricha, Asadning qaror qabul qilmasligi va beparvoligi nafaqat uning hokimiyatini, balki butun davlat tizimini izdan chiqargan. Bu holat Suriya uchun og‘riqli saboq bo‘ldi.
Endi asosiy maqsad — yangi bosqichda tinchlikni ta’minlash va aholi hayotini yaxshilashdir. Tarix shuni ko‘rsatadiki, ba’zan davlatni tank emas, balki rahbarning sukuti ham yengishi mumkin.
