Rossiya dronlari Ukrainaga hujum qildi, qurbonlar bor
8-fevralga o‘tar kechasi Rossiya Qurolli kuchlari tomonidan Ukraina hududiga yirik hujum uyushtirildi. Bu haqda Zamin.uz xabar berdi.
Ukraina Havo kuchlari bergan ma’lumotga ko‘ra, hujumda 101 ta uchuvchisiz apparat, jumladan, Shahed turidagi kamikadze-dronlar, “Gerbera”, “Italmas” va boshqa turdagi qurilmalar qo‘llangan. Bu dronlar Kursk, Oryol, Bryansk, Primorsko-Axtarsk va Shatalovo yo‘nalishlaridan uchirilgan.
Ukraina havo mudofaasi 69 ta dronni urib tushirgan yoki elektron vositalar yordamida zararsizlantirgan. Biroq, 32 ta dron o‘z nishoniga yetib borgan.
Eng og‘ir xabar Kramatorskdan keldi. Donesk viloyati prokuraturasining ma’lum qilishicha, soat 05:00 atrofida shaharga FAB-250 aviabombasi tashlangan.
Portlash natijasida bir ayol halok bo‘lgan, uch erkak jarohatlangan. Uylar va avtomobillar zarar ko‘rgan.
Holat yuzasidan tergov boshlangan. Xerson shahrining markaziy qismi va Korabelniy tumani reaktiv tizimlardan o‘qqa tutilgan.
Ayrim manbalarda sakkiz ayol yaralangani, ba’zilarini vayronalar ostidan qutqarishgan. Uylar va boshqa binolar ham zarar ko‘rgan.
Poltava viloyatida Naftogaz obyektlari nishonga olingan, asbob-uskunalar shikastlangan, ammo jabrlanganlar yo‘q. Odessa atrofida esa sanoat obyekti zarar ko‘rgan, portlash to‘lqini diniy inshootlarga ham zarar yetkazgan.
Lvivda ham portlashlar qayd etilgan. Bir dron zararsizlantirilgan, jabrlanganlar yo‘q.
Ushbu voqealar shuni ko‘rsatmoqdaki, Ukraina hududining turli nuqtalarida xavf yuqori darajada saqlanib qolmoqda. Infratuzilma va aholi yashash joylari hanuz xavf ostida.
