Ona ikki farzandini beshinchi qavatdan tashladi
Qozog‘istonning Jambil viloyatida joylashgan Taraz shahrida og‘ir va dahshatli voqea yuz berdi. Bu haqda Zamin.uz xabar berdi.
Viloyat politsiya boshqarmasi ma’lumotiga ko‘ra, ona o‘zining ikki nafar farzandini ko‘p qavatli uyning beshinchi qavati derazasidan pastga uloqtirgan. Ushbu holat bo‘yicha «NUR.KZ» nashri xabar berdi.
Ma’lum qilinishicha, 2021 va 2023 yillarda tug‘ilgan ikki bola mo‘jizaviy tarzda tirik qolgan, ammo ular jiddiy tan jarohatlari olgan. Shifokorlarning xabariga ko‘ra, bolalarda yopiq bosh miya shikasti va miya shishi aniqlangan.
Shuningdek, katta farzandning son suyagi siljigan. Hozirda tibbiyot xodimlari bolalarning hayotini saqlab qolish uchun barcha zarur choralarni ko‘rmoqda.
Eng kichik bolaning bosh, ko‘krak qafasi va tos suyaklari bo‘yicha kompyuter tomografiya tekshiruvlari o‘tkazilgan. Zarur tibbiy muolajalar, jumladan, laparotsentez amaliyoti bajarilgan va davolash jarayonlari davom etmoqda.
Katta farzandga esa oyoq suyagi bo‘yicha jarrohlik amaliyoti rejalashtirilgan. Hodisa yuzasidan sudgacha tergov harakatlari boshlandi.
Gumonlanuvchi ayol qo‘lga olinib, vaqtinchalik saqlash hibsxonasiga joylashtirildi. Hozirda ish bo‘yicha barcha tergov tadbirlari olib borilmoqda.
Ayolning bunday harakatiga nima sabab bo‘lgani hozircha aniqlanmagan.
