Ka’ba Kisvasi bo‘laklari Epshteynga qanday yetkazilgan?

Yaqinda e’lon qilingan hujjatlarga ko‘ra, Makkadagi muqaddas Ka’ba Kisvasining bo‘laklari AQShga yuborilgani ma’lum bo‘ldi. Bu haqda Zamin.uz xabar berdi.

Ushbu matolar Birlashgan Arab Amirliklari orqali tashkil etilgan jo‘natmalar bilan Jeffri Epshteynga yetkazilgan. Ma’lumotlarga ko‘ra, 2017 yilning fevral va mart oylarida Aziza al-Ahmadiy ismli tadbirkor ayol Abdulloh al-Maari bilan hamkorlikda Kisvaning uchta bo‘lagini jo‘natgan.

Kisva islom olamida alohida hurmatga ega bo‘lib, har yili Ka’badan eski mato olib tashlanib, uning o‘rniga yangisi joylashtiriladi. Eski Kisva qismlari esa diniy va tarixiy ahamiyatga ega bo‘lgan noyob buyum sifatida saqlanadi.

Hujjatlarda aytilishicha, bu yuk Saudiya Arabistonidan Floridaga British Airways orqali havo transporti bilan yuborilgan. Yuk 2017 yil mart oyida Epshteynning Floridadagi uyiga yetkazilgan.

Shu vaqtga kelib, Epshteyn jinsiy jinoyatlar uchun sudlangan va maxsus ro‘yxatga olingan edi. Elektron yozishmalarda Aziza al-Ahmadiy Epshteynga Kisvaning diniy ahamiyatini alohida ta’kidlab yozgani qayd etilgan.

Ammo bu matoning nega aynan unga yuborilgani va tomonlar o‘rtasidagi aloqaning qanday boshlanganiga oid batafsil ma’lumotlar ochiqlanmagan.