Maktab o‘quvchisi zamburug‘larga qarshi bakteriya topdi
Moskva viloyatining Pushino shahridagi maktabda o‘quvchi tomonidan kutilmagan ilmiy kashfiyot amalga oshirildi. Bu haqda Zamin.uz xabar berdi.
11-sinf o‘quvchisi Nikolay Ulikov laboratoriya mashg‘ulotida tasodifan zamburug‘larga qarshi samarali bakterial shtammni aniqladi. Bu haqda “MK” xabar berdi.
Dars davomida o‘quvchilar Petri kosalarida tipratikan qo‘ziqorini o‘stirish bilan shug‘ullanishgan. Tabiatdan olingan qo‘ziqorin bilan birga turli mikroorganizmlar ham muhitga tushib ketgan.
Bir necha vaqt o‘tgach, Ulikov Petri kosasida g‘alati manzarani kuzatgan: kichik bakterial koloniya atrofida steril halqa, ya’ni boshqa mikroorganizmlar o‘sa olmaydigan zona hosil bo‘lgan. Keyingi tadqiqotlar shuni ko‘rsatdiki, bu bakterial shtamm zamburug‘larning o‘sishini bostiruvchi modda ajratib chiqaradi.
Ushbu modda koloniya atrofida steril zona hosil qilib, zamburug‘ va boshqa mikroorganizmlarning tarqalishiga to‘sqinlik qiladi. Ushbu topilma qishloq xo‘jaligida katta ahamiyat kasb etishi mumkin.
Bakteriyalar ekinlarni zamburug‘li kasalliklardan himoya qilishda qo‘llanilishi ehtimoli bor. Bu esa og‘ir kimyoviy vositalardan foydalanishni kamaytirib, tabiiy va samarali yechimlarni ishlab chiqishga imkon yaratadi.
Mazkur kashfiyot oddiy laboratoriya mashg‘ulotida boshlangan bo‘lsa-da, kelajakda ilmiy tadqiqotlar uchun yangi yo‘nalish ochishi mumkin. Ilm-fanda ba’zan eng muhim yutuqlar ana shunday tasodifiy kashfiyotlar bilan boshlanadi.
