Chexiyada bolalarga ijtimoiy tarmoqlarni taqiqlash rejalashtirilmoqda
Chexiya hukumati 15 yoshgacha bo‘lgan bolalarga ijtimoiy tarmoqlardan foydalanishni taqiqlash masalasini ko‘rib chiqmoqda. Bu haqda Zamin.uz xabar berdi.
Mamlakat bosh vaziri Andrey Babish bu tashabbusni qo‘llab-quvvatlashini ma’lum qildi. U o‘z murojaatida bu qaror Fransiyaning tajribasidan ilhomlangan holda qabul qilinayotganini ta’kidladi.
"Men ushbu taqiq tarafdoriman, chunki mutaxassislar ijtimoiy tarmoqlarning bolalarga salbiy ta’sir ko‘rsatishini aytmoqda. Biz bolalarni himoya qilishimiz kerak", — dedi Babish.
Bosh vazir o‘rinbosari Karel Gavlichekning so‘zlariga ko‘ra, hukumat bu masala bo‘yicha mutaxassislar bilan maslahatlashib, yil oxiriga qadar rasmiy taklif tayyorlashni rejalashtirmoqda. U ijtimoiy tarmoqlarning bolalar hayotiga salbiy ta’sir ko‘rsatishini "vabo" darajasidagi muammo deb atadi va bu masalani jiddiy hal qilish zarurligini ta’kidladi.
Eslatib o‘tamiz, yanvar oyida Fransiya milliy majlisi shunga o‘xshash qonun loyihasini birinchi o‘qishda ma’qullagan edi. Shuningdek, Avstraliya 2025 yildan boshlab 16 yoshgacha bo‘lgan bolalarning ijtimoiy tarmoqlarga kirishiga taqiq qo‘yishni rejalashtirgan.
Ispaniyada ham bu borada yangi reja ishlab chiqilmoqda. Hozirda bolalarni onlayn xavflardan himoya qilish masalasi ko‘plab davlatlar kun tartibidagi dolzarb mavzu bo‘lib qolmoqda.
