Firibgarlar ko‘proq kimlarga qo‘ng‘iroq qilishadi?
Rossiya Federatsiyasi Moliya universiteti dotsenti Petr Shcherbachenko bergan ma’lumotga ko‘ra, firibgarlar eng ko‘p qo‘ng‘iroq qiladigan rossiyaliklarning ikki toifasi aniqlangan. Bu haqda Zamin.uz xabar berdi.
Bu haqda u RG.RU nashriga bergan intervyusida ma’lum qilgan. Mutaxassisning ta’kidlashicha, xavf ostidagi birinchi toifa daromadi 50 ming rubldan yuqori bo‘lgan 35-44 yosh oralig‘idagi fuqarolardir.
Ikkinchi toifa esa 65 yoshdan oshgan nafaqaxo‘rlardan iborat. Firibgarlar keksa odamlardan rasmiy qo‘ng‘iroqlarga ishonuvchanliklarini, o‘rta yoshdagilardan esa qo‘shimcha daromadga qiziqishlarini suiiste’mol qilishga urinadi.
Shcherbachenko yirik shaharlardagi fuqarolar firibgarlik qo‘ng‘iroqlari uchun asosiy nishon ekanini qayd etdi. Ma’lumotlarga ko‘ra, barcha firibgarlik qo‘ng‘iroqlarining 16,8 foizi Moskva, 7 foizi Krasnodar, 6,3 foizi Sankt-Peterburg, 3,5 foizi Novosibirsk va 3,2 foizi Ufa aholisi orasida qayd etiladi.
Unga ko‘ra, firibgarlar odatda tushdan keyin, ayniqsa soat 16:00 dan 18:00 gacha faol bo‘lishadi. Mutaxassisning qo‘shimcha qilishicha, "+7" bilan boshlanmaydigan telefon raqamlari va xabar almashish ilovalari orqali kelgan qo‘ng‘iroqlar xavfli bo‘lishi mumkin.
Firibgarlar ko‘pincha texnologiyadan foydalanib, telefon raqamlarini soxtalashtiradi. Shu sababli, bunday qo‘ng‘iroqlarga ehtiyotkorlik bilan yondashish zarur.
