Aliya Galitskaning dafn marosimi yaqin kunlarda bo‘lib o‘tadi

Aliya Galitskaning dafn marosimi qachon o‘tkazilishi ma’lum bo‘ldi. Bu haqda Zamin.uz xabar berdi.

Moskva yaqinidagi vaqtincha saqlash hibsxonasida vafot etgan Aliya Galitskani dafn etishga tergovchi ruxsat bergan. Bu haqda uning advokati Dmitriy Yemelyanov ma’lum qildi.

Advokatning so‘zlariga ko‘ra, murdani yorish va sud-tibbiy ekspertizasi tugallangach, tergov ishlari yakunlangan. Dafn marosimi yaqin kunlarda o‘tkazilishi rejalashtirilgan.

Galitskaning o‘limi haqida xabar o‘tgan yakshanba kuni tarqalgan edi. Avvalgi ma’lumotlarga ko‘ra, u 6 fevral kuni Istra shahar sudining qarori bilan hibsga olinganidan so‘ng o‘z joniga qasd qilgan.

Galitskaya sobiq turmush o‘rtog‘i Aleksandr Galitskiydan 150 million dollar tovlamachilikda gumon qilinib hibsga olingan edi. Aleksandr Galitskiy avval Rossiya banklaridan birining direktorlar kengashi a’zosi bo‘lgan.

Voqeadan so‘ng Rossiya Tergov qo‘mitasi o‘lim sabablarini o‘rganishni boshladi. Himoya tomoni ehtiyot choralarini qayta ko‘rib chiqishni talab qilgan.

Galitskaya esa o‘ziga qo‘yilgan ayblovlarni rad etgan edi. Ma’lum bo‘lishicha, o‘tgan kuzda Galitskaya Moskvaning Presnenskiy sudiga sobiq turmush o‘rtog‘i bilan mulkni bo‘lishish bo‘yicha da’vo arizasi kiritgan.

Bu jarayonda sud Galitskiyga tegishli bo‘lgan ko‘chmas mulkka taqiq qo‘ygan. Mazkur mulklarning kadastr qiymati 435 million rubl bo‘lsa, da’vogar tomonning hisobiga ko‘ra, bozor qiymati 1,2 milliard rubldan oshgan.

Galitskaning vafoti sababli 10-fevralga belgilangan sud ishi to‘xtatilishi kutilmoqda.