Yevroparlament Ukrainaga harbiy yordamni oshirishni talab qildi
Yevroparlamentning mudofaa va xavfsizlik qo‘mitasi 9-fevral kuni Ukrainaga harbiy yordamni zudlik bilan kengaytirish zarurligini ta’kidladi. Bu haqda Zamin.uz xabar berdi.
Qo‘mita vakillari 5–6-fevral kunlari Kiyevga tashrif buyurib, mavjud vaziyatni o‘rgangan. Ularning ma’lum qilishicha, muzokaralar davom etayotganiga qaramay, hududda o‘t ochishni to‘xtatish alomatlari kuzatilmagan.
Qo‘mita raisi Mari-Agnes Shtrak-Simmermanning so‘zlariga ko‘ra, Kiyevda bo‘lgan vaqtida Rossiya tomonidan fuqarolik infratuzilmasiga raketa zarbalari berilgani va tinch aholi orasida qurbonlar bo‘layotgani kuzatilgan. Minglab odamlar sovuqda isitish va elektr ta’minotisiz qolib, og‘ir sharoitda yashayotgani ham qayd etilgan.
Raisning fikricha, tinchlikka erishish uchun faqat umid qilish yetarli emas, Ukrainaga yordam ko‘rsatib, harakat qilish zarur. Yevroparlament delegatsiyasining Kiyevga tashrifi Strasburgda bo‘lib o‘tadigan majlis oldidan amalga oshirilgan.
11-fevral kuni majlisda Yevropa Ittifoqi tomonidan Ukrainaga 90 milliard yevro miqdorida kredit ajratish masalasi muhokama qilinishi rejalashtirilgan. Tashrif davomida delegatsiya Ukraina prezidenti ofisi, hukumat vakillari, Oliy Rada rahbariyati hamda fuqarolik jamiyati va mudofaa sanoati vakillari bilan uchrashuvlar o‘tkazgan.
Yevroparlament matbuot xizmati tarqatgan xabarga ko‘ra, Yevropa Ittifoqi fuqarolari Ukrainani qo‘llab-quvvatlash va Yevropa mudofaasini kuchaytirishga chaqirmoqda. Shuningdek, Ukraina Yevropa Ittifoqining mudofaa tashabbuslarida faol ishtirok etishga qiziqish bildirayotgani ta’kidlangan.
Xususan, Yevropa mudofaa sanoati dasturi va “Yevropa uchun xavfsizlik” instrumenti kabi yo‘nalishlar muhim ekani qayd etilgan. Qo‘mita o‘z pozitsiyasini aniq belgilab, vaziyatni “kutamiz” degan yondashuvda emas, balki “hozir harakat qilamiz” degan tamoyil asosida baholamoqda.
Muzokaralar davom etayotgan bo‘lsa-da, frontdagi voqealar va tinch aholining holati Ukrainaga yordamni oshirish zaruratini kun tartibiga olib chiqmoqda.
