Ramzan Qodirov o‘g‘li haqidagi mish-mishlarni rad etdi
Checheniston rahbari Ramzan Qodirov o‘g‘li, mintaqa Xavfsizlik kengashi kotibi Adam Qodirov ishtirok etgani aytilgan yo‘l-transport hodisasi haqidagi xabarlarni rad etdi. Bu haqda Zamin.uz xabar berdi.
Qodirov ushbu ma’lumotlarni asossiz va “soxta tashviqot” deb atadi. Bu haqda u 9-fevral kuni respublika prokurori Arsan Adayev bilan uchrashuv davomida ma’lum qildi.
Ramzan Qodirovning ta’kidlashicha, hozirda sun’iy intellekt yordamida turli soxta videolar va axborotlar tayyorlash osonlashgan. Shu sababli odamlarni bunday ma’lumotlar bilan chalg‘itish holatlari tez-tez uchrab turibdi.
U mamlakat bo‘ylab 128 mingta yo‘l-transport hodisasi qayd etilganini, natijada 13 mingdan ortiq odam halok bo‘lganini qayd etdi. Ammo bu kabi jiddiy hodisalar ommaviy muhokama qilinmayotgan bir paytda, noma’lum manbalardan kelib chiqqan va uning o‘g‘li ishtirok etgan deb iddao qilingan avariya haqidagi xabarlar xalqaro darajada katta shov-shuvga sabab bo‘lganini tanqid qildi.
Shuningdek, Qodirov Checheniston hududida internet orqali sodir etilayotgan jinoyatlarga qarshi kurashish choralari kuchaytirilishini ma’lum qildi. Uning so‘zlariga ko‘ra, soxta axborotlarga qarshi kurash butun mamlakat uchun muhim masala hisoblanadi.
Chechenistonga oid ishonchsiz ma’lumotlar esa ommaviy axborot vositalarida tez-tez paydo bo‘lib, ortiqcha shov-shuvga sabab bo‘layotgani alohida ta’kidlandi.
