Afrika Kubogi Senegal qamoqxonasida namoyish qilindi

Afrika Millatlari Kubogi sovrini Senegal bo‘ylab o‘z sayohatini davom ettirmoqda. Bu haqda Zamin.uz xabar berdi.

Ushbu tadbir faqat oddiy namoyish emas, balki alohida maqsad va mazmunga ega bo‘lgan turne sifatida tashkil etilmoqda. Kubokning navbatdagi manzili ko‘pchilikni hayratga soldi: u Dakar shahridagi eng yirik va gavjum jazo muassasasi – Rebeyss qamoqxonasiga olib borildi.

Tashkilotchilarning ta’kidlashicha, bu tashrifdan asosiy maqsad sovrinni har bir inson uchun yaqin qilish, milliy g‘urur va birdamlik tuyg‘usini keng ommaga yetkazishdir. Shu sababli mahbuslarga ham qit’adagi eng nufuzli futbol sovrinini ko‘rish va hatto unga qo‘l tekkizish imkoniyati berildi.

Ushbu tashabbus Senegal futbol federatsiyasi tomonidan qo‘llab-quvvatlangani aytilmoqda. Biroq bu qaror jamiyatda turli fikr-mulohazalarga sabab bo‘ldi.

Ijtimoiy tarmoqlarda qamoqxonadan olingan videolar va suratlar keng tarqaldi. Ular orasida mahbuslarning kubokka qo‘l cho‘zayotgani yoki panjara ortidan uni tomosha qilayotgani aks etgan kadrlar mavjud.

Jamiyatda bu holatni ayrimlar insonparvarlik namoyishi sifatida qabul qilsa, boshqalar buni tanqid qilib, “bunday sovrinni qamoqxonaga olib borish qanchalik to‘g‘ri?” degan savolni o‘rtaga tashlashmoqda. Ma’lumki, Senegal terma jamoasi yanvar oyida Afrika Millatlari Kubogining finalida Marokashni 1:0 hisobida mag‘lub etib, ushbu sovrinni qo‘lga kiritgan edi.

Shundan so‘ng, kubok butun mamlakat bo‘ylab olib borilib, milliy iftixor va birlashuv ramzi sifatida namoyish qilinmoqda. Shubhasiz, bu kubok Senegal uchun oddiy trofey emas, balki jamoani va jamiyatni birlashtirishga qaratilgan katta ramzdir.

Biroq uni qayerda va qanday sharoitda namoyish qilish masalasi hali hamon bahsli bo‘lib qolmoqda.