Keniyada Valentin kuni oldidan pulni shikastlash taqiqlandi
Keniyada Valentin kuni arafasida naqd puldan guldasta tayyorlash amaliyoti bo‘yicha qat’iy ogohlantirish e’lon qilindi. Bu haqda Zamin.uz xabar berdi.
Mamlakat Markaziy banki 14-fevral munosabati bilan chiqargan bayonotida banknotalardan guldasta yoki sovg‘a bezaklari sifatida foydalanish qonunga zid ekanini eslatdi. Bu haqda CNN xabar berdi.
Ma’lum qilinishicha, Keniyada so‘nggi vaqtlarda shilling kupyuralarini guldastalarga bezak sifatida ishlatish holatlari ko‘paygan. Bu esa milliy valyutaning yaxlitligiga salbiy ta’sir ko‘rsatishi mumkin.
Chunki banknotalarni yelim, shtapel yoki ignalar yordamida biriktirish ularni shikastlaydi va muomala uchun yaroqsiz holga keltiradi. Natijada bunday kupyuralarni qayta ishlash jarayonida rad etish talab etiladi yoki ularni muddatidan oldin muomaladan chiqarish va almashtirishga to‘g‘ri keladi.
Shu sababli, Markaziy bank naqd pulni sovg‘a sifatida taqdim etishga qarshi emasligini bildirgan holda, banknotalarni o‘zgartirish, buzish yoki shikastlashdan tiyilishni tavsiya qildi. Keniya Jinoyat kodeksining 367-moddasiga ko‘ra, valyuta banknotalarini shikastlash, uning yaxlitligini buzish yoki yaroqsiz holga keltirish taqiqlangan.
Ushbu qoidani buzgan shaxslar 3 oygacha qamoq jazosi, 2000 shilling (taxminan 15,5 AQSH dollari) miqdorida jarima yoki har ikkala jazo bilan jazolanishi mumkin.
