Yevroparlament: Rossiya harakatlari urush jinoyati hisoblanadi
Strasburgda o‘tkazilgan Yevroparlament yig‘ilishi davomida Ukrainaning energetika tizimiga qaratilgan hujumlar va bu hujumlar natijasida yuzaga kelgan gumanitar inqiroz keng muhokama qilindi. Bu haqda Zamin.uz xabar berdi.
Yevropa Ittifoqi vakillarining fikricha, Rossiya sovuq va zulmatni qurol sifatida qo‘llab, ukrain xalqining irodasini sindirishga urinmoqda. Yevrokomissar Marta Kosning qayd etishicha, Ukraina infratuzilmasiga qaratilgan zarbalar faqat harbiy harakat emas, balki aholiga chidab bo‘lmas sharoit yaratishga qaratilgan tizimli jinoyatdir.
U Rossiya bu harakatlar uchun javobgarlikka tortilishini va Kremlga qarshi yangi sanksiyalar paketi ustida ish olib borilayotganini ta’kidladi. Yevropa Ittifoqi Ukrainani yolg‘iz qoldirmaslikka va’da bermoqda.
Ma’lumotlarga ko‘ra, 2022 yildan buyon Ukrainaga 1,3 milliard yevro miqdorida gumanitar yordam ko‘rsatilgan, 2026 yil uchun esa yana 145 million yevro ajratilishi rejalashtirilgan. Shu vaqtga qadar Ukrainaga 11 mingdan ortiq generator va 7 mingta transformator yetkazib berilgan.
Shunga qaramay, deputatlar fikricha, faqat texnik yordam tinchlikni ta’minlash uchun yetarli emas. Ukraina osmonini himoya qilish masalasi ham ustuvor vazifa sifatida qayd etildi.
Yig‘ilish davomida deputatlar Ukraina energetika sektoriga yetkazilgan iqtisodiy zarar ko‘lamini ham muhokama qilishdi. Jahon banki hisob-kitoblariga ko‘ra, bu zarar 68 milliard dollardan oshgan.
Deputatlarning ta’kidlashicha, Yevropa tomonidan ajratilayotgan mablag‘lar Kremlning vayronkor harakatlari oldida juda kam. Agar hozirda yetarli yordam ko‘rsatilmasa, bu kelajakda inson hayotlari bilan o‘lchanishi mumkinligi haqida ogohlantirish berildi.
Siyosiy munozaralar davomida ayrim deputatlar Yevropa Ittifoqini urushni to‘xtatish choralarini ko‘rmaslikda tanqid qilishdi. Biroq, bu fikrlar boshqa deputatlar tomonidan qattiq qarshilik bilan kutib olindi.
"Yashillar" fraksiyasi vakili Damian Bezelager bu harakatlarni "sovuqdan o‘lim" deb atadi va buni zamonaviy urush jinoyatlaridan biri sifatida baholadi. Yevropaning Ukrainaga ko‘rsatayotgan yordami ushbu qishdan chiqish uchun yetarlimi, degan savol hanuz ochiq qolmoqda.
Deputatlar esa bu borada yanada faolroq choralar ko‘rishga chaqirishmoqda.
