Generalga suiqasd gumonlisi xalqaro qidiruvda
Rossiya Qurolli kuchlari Bosh shtabi Harbiy razvedka bosh boshqarmasi rahbari o‘rinbosari, general-leytenant Vladimir Alekseyevga qarshi uyushtirilgan suiqasd ishi bo‘yicha gumon qilinayotgan Zinaida Serebritskaya xalqaro qidiruvga berildi. Bu haqda Zamin.uz xabar berdi.
Bu haqda TASS axborot agentligi jinoyat ishi materiallariga tayanib xabar berdi. Tergov materiallariga ko‘ra, Zinaida Serebritskaya xalqaro qidiruvda bo‘lgan shaxs sifatida rasman ro‘yxatga olingan.
U Rossiya hududini tark etib, hozirda Turkiyada, xususan Istanbul shahrida yashiringani aytilmoqda. Ma’lum bo‘lishicha, Serebritskaya Rossiyadan to‘g‘ridan to‘g‘ri Istanbulga uchib ketgan.
Shuningdek, u Rossiya fuqaroligiga ega bo‘lib, mazkur pasportdan Lugansk hududidan Rossiyaga kirib kelish va mamlakat ichida erkin harakatlanish uchun foydalangan. Avvalroq TASS agentligi kuch tuzilmalariga tayanib, Serebritskaya Rossiya Federatsiyasi Jinoyat kodeksining 317-moddasi – huquqni muhofaza qilish organi xodimining hayotiga tajovuz qilish aybi bilan federal qidiruvga berilganini xabar qilgan edi.
Moskvaning Zamoskvoretskiy tuman sudida Zinaida Serebritskayaga sirtdan qamoqqa olish tarzida ehtiyot chorasi qo‘llanilgani haqida ham ma’lum qilingan. Tergov ishlari davom etmoqda.
