Turkiyada o‘zbekistonliklar firibgarlik qurboni bo‘lmoqda
Turkiyada yashayotgan yoki mehnat qilayotgan o‘zbekistonlik fuqarolar ko‘pincha firibgarlik va odam savdosi bilan bog‘liq jinoyatlar qurboniga aylanmoqda. Bu haqda Zamin.uz xabar berdi.
Bu haqda O‘zbekistonning Istanbul shahridagi Bosh konsuli Sherzod Abdunazarov ma’lumot berdi. Bosh konsulning so‘zlariga ko‘ra, O‘zbekistonning Istanbuldagi Bosh konsulxonasi faoliyat hududiga Istanbul shahri bilan bir qatorda Aydin, Balikesir, Bilejik, Bursa, Izmir, Kojayeli kabi viloyatlar hamda Bolgariya va Ruminiya davlatlari kiradi.
Diplomatning ta’kidlashicha, ushbu hududlarda o‘zbekistonliklar tomonidan jinoyat sodir etish ko‘rsatkichi boshqa millat vakillariga nisbatan ancha past. Shu bilan birga, Turkiyada o‘zbekistonliklar sonining ko‘pligi va 90 kunlik vizasiz rejim mavjudligi sababli, ba’zida O‘zbekistonda jinoyat sodir etib, Turkiyaga qochib kelgan shaxslar ham uchrab turadi.
Bundan tashqari, rasmiy ruxsatnomasiz yashayotgan fuqarolar bilan bog‘liq muammolar ham kuzatilmoqda. Ma’lum qilinishicha, jabrlanuvchilar orasida firibgarlik va odam savdosi eng ko‘p uchraydigan jinoyatlar hisoblanadi.
Ayniqsa, odam savdosi qurboni bo‘layotganlar orasida AQSH va Yevropa davlatlariga noqonuniy yo‘llar orqali chiqib ketishga urinish holatlari ko‘p uchrayotgani qayd etilgan. Shuningdek, Turkiya orqali Suriya hududiga o‘tishga urinishlar bo‘yicha statistik ma’lumotlar so‘nggi paytlarda sezilarli darajada kamaygan.
