Erdog‘an o‘g‘li voris bo‘lishi mumkinmi?

Bloomberg nashrining xabariga ko‘ra, Turkiya prezidenti Rajab Toyyib Erdog‘anning kenja o‘g‘li hukumat kadrlarini tanlash jarayonida faol ishtirok etmoqda. Bu haqda Zamin.uz xabar berdi.

Shuningdek, uning kelajakda otasining vorisi sifatida tayyorlanayotgani ehtimoli ham mavjud. Turkiya qonunchiligiga muvofiq, Erdog‘an 2028 yilda prezidentlik lavozimidan ketishi kerak.

Biroq, ayrim ma’lumotlarga ko‘ra, uning oilasi va Adolat va taraqqiyot partiyasi (AKP) rahbariyati bu muddatdan so‘ng hokimiyatni uning o‘g‘liga o‘tkazishni rejalashtirgan. Agar parlament tomonidan muddatdan oldin saylovlar o‘tkazilsa yoki konstitutsiyaga o‘zgartirish kiritilsa, Erdog‘an yana prezidentlikka nomzodini qo‘yishi mumkin.

Bloomberg tahlillarida ta’kidlanishicha, bunday vorislik jarayoni uchun ichki siyosiy va xalqaro sharoitlar mos deb baholanmoqda. Biroq hozircha bu borada rasmiy tasdiq yo‘q.

Ma’lumki, Erdog‘an 2014 yildan beri Turkiya prezidenti lavozimida faoliyat yuritmoqda. U bunga qadar, 2003–2014 yillarda bosh vazir sifatida ishlagan.

2023 yilgi prezidentlik saylovlarida esa ikkinchi turda 52,18 foiz ovoz bilan g‘alaba qozongan. Keyingi prezidentlik saylovlari Turkiyada 2028 yilga belgilangan.