Qoraqalpog‘iston sobiq rahbari Qallibek Kamolov vafot etdi

Qoraqalpog‘istonning sobiq rahbari Qallibek Kamolov vafot etdi. Bu haqda Zamin.uz xabar berdi.

Ma’lumotlarga ko‘ra, Qallibek Kamolov 1926 yil 18 martda tug‘ilgan. U 1947 yilda Qoraqalpog‘iston o‘qituvchilar institutini tamomlagan.

O‘qishni tugatguniga qadar o‘qituvchilik qilgan va keyinchalik komsomol tizimida faoliyat boshlagan. Mehnat faoliyati davomida Qallibek Kamolov turli mas’uliyatli lavozimlarda ishlagan.

U Qoraqalpog‘iston ASSR Vazirlar Kengashi raisi o‘rinbosari, Nukus shahar ijroiya qo‘mitasi raisi, kommunal xo‘jalik vaziri, shuningdek, respublika avtomobil transporti va avtomobil yo‘llari vaziri lavozimlarida faoliyat yuritgan. 1958–1959 yillarda O‘zbekiston Kompartiyasi Qoraqalpog‘iston viloyat qo‘mitasi kotibi, 1959–1963 yillarda Qoraqalpog‘iston ASSR Vazirlar Kengashi raisi bo‘lgan.

1963–1984 yillarda esa O‘zbekiston Kompartiyasi Qoraqalpog‘iston viloyat qo‘mitasining birinchi kotibi sifatida ishlagan. 1984–1986 yillarda Qallibek Kamolov Sovet Ittifoqining Ruminiyaning Konstansa shahridagi bosh konsuli lavozimida faoliyat yuritgan.

1987 yilda u “paxta ishi” doirasida qo‘lga olingan. 1989 yil oxirida unga 15 yil ozodlikdan mahrum etish jazosi tayinlangan va Sotsialistik Mehnat Qahramoni unvoni hamda boshqa davlat mukofotlaridan mahrum qilingan.

Keyinchalik, boshqa sudlangan shaxslar qatorida u ham afv etilgan.