Rossiyada o‘zbekistonlik shaxs 20 yilga qamaldi
Rossiyada terrorchilik faoliyatida gumon qilingan O‘zbekiston fuqarosi ustidan sud hukmi chiqarildi. Bu haqda Zamin.uz xabar berdi.
O‘zbekiston fuqarosi O‘tkirov Javohir Davronovich Rossiya Federatsiyasi Jinoyat kodeksining bir nechta moddalariga muvofiq jinoyat sodir etishda aybdor deb topildi. Sud materiallariga ko‘ra, u 2023 yil yanvar oyida Rossiyada taqiqlangan "Islom davlati" terrorchilik tashkiloti manfaatlari yo‘lida harakat qilishga tayyorligini videomurojaat orqali bildirgan.
Shundan so‘ng, tashkilot ko‘rsatmalariga binoan ehtimoliy hujum uchun joy tanlash, razvedka ishlarini amalga oshirish va portlovchi qurilma tayyorlashga doir vazifalarni o‘z zimmasiga olgani aytiladi. Ma’lumotlarga ko‘ra, u 2023 yil sentyabr oyida Rossiyaga borib, Stavropol shahridagi ayrim obyektlarga oid foto va video materiallar tayyorlab, ularni tashkilot vakillariga yuborgan.
Dekabr oyida esa portlovchi qurilma uchun kerakli qismlar xarid qilgani qayd etilgan. O‘tkirov 2023 yil 18 dekabr kuni qo‘lga olingan.
Sud hukmiga ko‘ra, u 20 yil muddatga ozodlikdan mahrum qilindi. Jazoning dastlabki 5 yili qamoqda, qolgan qismi esa qat’iy tartibli koloniyada o‘taladi.
Shuningdek, unga 1 million rubl miqdorida jarima ham belgilangan. Hozircha hukm qonuniy kuchga kirmagan va apellyatsiya tartibida shikoyat qilinishi mumkin.
