100 dollarlik domen 70 millionga sotildi
Internetda ba’zida shunday voqealar bo‘ladiki, o‘qib, "qani edi, men ham bir paytlar shunday qilganimda..." deb o‘ylab qolasan. Bu haqda Zamin.uz xabar berdi.
Malayziyalik Arsyan Ismoil ham shunday tarixiy voqeaning markazida bo‘ldi. U 1993 yilda atigi 100 dollarga sotib olgan ai.com domenini yaqinda 70 million AQSH dollariga sotdi.
Bu summa tarixdagi eng qimmat domenlar qatoriga kiradi. Qiziq tomoni shundaki, bu manzilni sotib olishda hech qanday katta biznes reja yo‘q edi.
Arsyan uni shunchaki o‘z ismi va familiyasi bosh harflariga mos kelgani uchun olgan. O‘sha paytda bu oddiy va chiroyli domen edi, xolos.
Hech qanday sun’iy intellekt xaypi yoki global ahamiyat haqida gap ham bo‘lmagandi. Biroq vaqt o‘tib, vaziyat butkul o‘zgardi.
Bugungi kunda AI (Artificial Intelligence — sun’iy intellekt) nafaqat texnologiya sohasidagi asosiy tushunchalardan biriga, balki dunyodagi eng qimmat "brend"lardan biriga aylandi. Kompaniyalar, startaplar va investorlar bu atrofida aylanmoqda.
Natijada oddiy domen katta qiymatga ega aktivga aylandi. Shunday qilib, 33 yil o‘tib, oddiy 100 dollarlik xarid ulkan daromad keltiruvchi kelishuvga aylandi.
Hisob-kitoblarga ko‘ra, bu sarmoya 700 ming baravar ortgan. Odatda bunday voqealar faqat kinolarda ko‘rinadi, lekin bu safar real hayotda ro‘y berdi.
Xulosa shuki, ba’zida eng katta muvaffaqiyatlar shovqin-suronsiz, oddiy qarorlardan boshlanadi. Bugun ahamiyatsiz tuyulgan bir narsa ertaga yirik trendga aylanishi mumkin.
Faqat bitta narsa muhim — sabr. Arsyan Ismoilning hikoyasi bunga yaqqol misol.
