Qozog‘iston neftining narxi rekord darajada pasaydi
Qozog‘istonning Kaspiy quvur konsorsiumi (KQK) orqali eksport qilinayotgan CPC Blend markasidagi neftning narxi jahon bozorlarida bir barrel uchun 5 dollargacha chegirma bilan sotilmoqda. Bu haqda Zamin.uz xabar berdi.
Bu ko‘rsatkich 2022 yil oxiridan beri kuzatilgan eng past daraja sifatida qayd etilmoqda. Ma’lumotlarga ko‘ra, narxlarning pasayishi CPC Blend neftiga bo‘lgan qiziqishni oshirgan va qisqa vaqt ichida talab tiklangan.
Shu sababli, past narxlar uzoq muddat davom etmagan. Mutaxassislar bu holatning asosiy sababini Qozog‘iston nefti yirik xaridorlari orasida yetkazib berishdagi uzilishlardan kelib chiqqan xavotir bilan izohlashmoqda.
Natijada ayrim xaridorlar vaqtincha boshqa neft markalariga o‘tib ketgan. So‘nggi oylarda KQK orqali neft yetkazib berish bir necha marotaba to‘xtatilgan.
Bu uzilishlar Ukraina dronlari hujumlari, noqulay ob-havo sharoiti, yuklash terminalidagi ta’mirlash ishlari, shuningdek, Tengiz konidagi generator yong‘ini oqibatida ishlab chiqarish hajmining qisqarishi bilan bog‘liq bo‘lgan. «Reuters» agentligi xabariga ko‘ra, fevral oyida Tengiz konidan neft eksporti rejalashtirilgan hajmning atigi 35 foizini tashkil qilishi kutilmoqda.
Yanvar oyida esa umumiy eksport hajmi rejaning taxminan yarmiga teng bo‘lgan. Yanvar oyida Kashagan konida qazib olingan neftning bir qismi ilk bor ichki bozorga yo‘naltirildi.
Odatda Qozog‘iston neftining 80 foizga yaqini KQK orqali eksport qilinadi. Quvur orqali Tengiz, Kashagan va Karachaganak konlaridan xomashyo yetkazib beriladi.
"ONE.UZ" yangiliklarini "Telegram"da kuzatib boring
