Bola 31 ta magnit yutdi: Shoshilinch operatsiya qilindi
Qozog‘istonda bir yosh to‘qqiz oylik bola 31 ta magnitni yutib yuborishi oqibatida jiddiy xavf ostida qolgan. Bu haqda Zamin.uz xabar berdi.
"Kazinform" axborot agentligi xabariga ko‘ra, bola Olmaota shahridagi shifoxonaga og‘ir ahvolda olib kelingan. Tekshiruv davomida uning ichaklarida ko‘plab magnitlar borligi aniqlangan.
Shifokorlar bola ichagining bir necha joyida teshilish yuzaga kelganini va qorin bo‘shlig‘ida yallig‘lanish kuchayib borayotganini qayd etishgan. Mazkur vaziyatda vaqt juda muhim bo‘lib, darhol shoshilinch operatsiya o‘tkazishga qaror qilingan.
Jarrohlar laparotomiya usulida qorin bo‘shlig‘ini ochib, magnitlarni olib tashlashgan, shikastlangan joylarni tikib, qorin bo‘shlig‘ini tozalab, drenaj o‘rnatgan. Shifokorlarning ta’kidlashicha, magnitlar ichakda bir-biriga tortilib, ichak devorlarini qisib qo‘yadi.
Bu qon aylanishining buzilishiga, to‘qimalarning zararlanishiga va ichakda teshiklar hosil bo‘lishiga olib keladi. Natijada qisqa vaqt ichida peritonit rivojlanishi mumkin.
Bolalar shoshilinch tibbiy yordam markazi jarrohi Asqar Rizvanov ota-onalarni hushyor bo‘lishga chaqirib, magnitli o‘yinchoqlarni bolalardan uzoqda saqlashni tavsiya qilgan. Mutaxassislarning ogohlantirishicha, hatto bitta magnit yutilgan taqdirda ham darhol shifokorga murojaat qilish zarur.
Bir nechta magnit yutilishi esa bolaning hayoti uchun jiddiy xavf tug‘diradi. Shu bois ota-onalar uyda bolalar uchun xavfli bo‘lishi mumkin bo‘lgan narsalarni ehtiyotkorlik bilan nazorat qilishlari kerak.
