Olmaotada blogerlar haqorat uchun 15 sutkaga qamaldi
Olmaota shahrida ikki nafar rossiyalik bloger qozog‘istonlik ayollar haqida jonli efir davomida haqoratli so‘zlar ishlatgani uchun ma’muriy javobgarlikka tortildi. Bu haqda Zamin.uz xabar berdi.
Ular 15 sutkaga qamoq jazosiga hukm qilindi. Ushbu voqea jamoatchilik orasida katta norozilikka sabab bo‘ldi va ular tomonidan aytilgan gaplar “kontent” bahonasida oqlanishga harakat qilingan bo‘lsa-da, bu holat jiddiy mojaro keltirib chiqardi.
Qozog‘iston Bosh prokuraturasi ma’lumotiga ko‘ra, mazkur holat “mayda bezorilik” sifatida baholanib, tegishli chora ko‘rilgan. Shuningdek, Qozog‘iston Jinoyat kodeksining millatlararo nafrat yoki adovat qo‘zg‘atishga oid 174-moddasi bo‘yicha ham tergov ishlari olib borilmoqda.
Mahalliy ommaviy axborot vositalarining xabar berishicha, qamoqqa hukm qilingan shaxslar Rinat Pashaev va Anar Abdullaev bo‘lib, ular keyinchalik o‘z xatolarini tan olib, jamoatchilikdan rasman uzr so‘ragan. Biroq Olmaota ixtisoslashtirilgan ma’muriy sudi ularning harakatlarini qonuniy ko‘rib chiqib, 15 sutkalik qamoq jazosini tayinlagan.
Mazkur voqea bir haqiqatni yana bir bor yodga soldi: omma oldida yoki kamera qarshisida aytilgan har bir so‘z mas’uliyatni talab qiladi. Ayniqsa, bu so‘zlar boshqa insonlarning qadr-qimmatiga tegadigan bo‘lsa, u hazil emas, jiddiy oqibatlarga olib kelishi mumkin.
