Zaharli qisqichbaqa bloger hayotiga zomin bo‘ldi

Filippinda ijtimoiy tarmoq uchun kontent yaratish istagi og‘ir fojia bilan yakunlandi. Bu haqda Zamin.uz xabar berdi.

51 yoshli oziq-ovqat blogeri Emma Amit zaharli qisqichbaqa iste’mol qilgani sababli ikki kun ichida hayotdan ko‘z yumdi. Bu haqda "New York Post" nashri xabar berdi.

Ma’lum bo‘lishicha, bloger do‘stlari bilan Palavan orolidagi Puerto Prinsesa shahri yaqinida dengiz mahsulotlarini yig‘ib, ularni tatib ko‘rib videoga olgan. U qisqichbaqa, kokos sutida pishirilgan dengiz shilliqqurti va boshqa dengiz jonzotlarini iste’mol qilgan.

Ammo ertasi kuni ayol o‘zini yomon his qila boshlagan. Zaharli toksinlar ta’siri kuchayib, uni shifoxonaga olib ketishgan.

Yo‘l-yo‘lakay tutqanoq belgilari kuzatilgan, lablari ko‘kimtir tusga kirgan. Shifokorlar barcha choralarni qo‘llaganiga qaramay, ayolni qutqarib qolishning imkoni bo‘lmagan.

U zaharli qisqichbaqa iste’mol qilganidan ikki kun o‘tib vafot etdi. Hodisadan so‘ng mahalliy qishloq rahbari Laddi Gemang marhumaning uyiga tekshiruv uchun vakillarni yuborgan.

U yerda chiqindilar orasidan yorqin rangli qisqichbaqaning po‘stloqlari topilgan. Mutaxassislarning fikricha, bu turdagi qisqichbaqalarda kuchli zahar — saksitoksin va tetrodotoksin bo‘lishi mumkin.

Bu moddalar inson hayotiga xavf solib, qisqa vaqt ichida o‘limga olib kelishi mumkin. Mahalliy rasmiylar yana bir bor aholini ehtiyotkorlikka chaqirdi.

Noma’lum yoki zaharli dengiz jonzotlarini iste’mol qilish hayot uchun o‘ta xavfli ekani ta’kidlandi. Ayniqsa, kontent yaratish maqsadida xavfli tajribalarga berilish qaytib kelmas oqibatlarga olib kelishi mumkin.