Portugaliyada bolalar uchun ijtimoiy tarmoq cheklovlari ma’qullandi
Portugaliya parlamenti bolalar va o‘smirlarning ijtimoiy tarmoqlardan foydalanishini cheklashga qaratilgan qonun loyihasini birinchi o‘qishda ma’qulladi. Bu haqda Zamin.uz xabar berdi.
Ushbu loyiha 13–16 yoshdagi bolalar uchun ijtimoiy tarmoqlardan foydalanishda ota-onaning aniq va tasdiqlangan roziligini talab qiladi. 13 yoshdan kichiklar uchun esa mavjud cheklovlar kuchaytirilib, nazorat yanada qat’iylashtiriladi.
Hujjat yakuniy ovoz berish jarayonida o‘zgarishi mumkin. Mazkur tashabbus Portugaliya Sotsial-demokratik partiyasi tomonidan ilgari surilgan bo‘lib, uning asosiy maqsadi kiberbulling, zararli kontent va yomon niyatli shaxslardan bolalarni himoya qilishdir.
Yoshni tekshirish va ota-onaning roziligini tasdiqlash uchun Digital Mobile Key tizimidan foydalanish rejalashtirilgan. Agar kompaniyalar bu talablarni bajarmasa, ular global daromadining 2 foizigacha jarimaga tortilishi mumkin.
Cheklovlar Instagram, Facebook va TikTok kabi ijtimoiy tarmoqlarga tegishli bo‘ladi. Biroq, WhatsApp platformasi istisno qilingan, chunki ko‘plab ota-onalar ushbu dasturdan farzandlari bilan muloqot qilish uchun foydalanadi.
Shu bilan birga, Portugaliya Sotsialistik partiyasi platformalar 13–16 yoshdagi foydalanuvchilarni zo‘ravonlik, erta jinsiy kontent, qaramlikka olib keladigan o‘yinlar va manipulyatsiya qilingan materiallar ta’siridan himoya qilish mexanizmlarini joriy etishi kerakligini ta’kidlamoqda.
