Osakada yigit uch o‘smirga pichoq bilan hujum qildi
Yaponiyaning Osaka shahrida 20 yoshli yigit uch nafar o‘smirga hujum qilib, ularga pichoq bilan tan jarohati yetkazdi. Bu haqda Zamin.uz xabar berdi.
Jabrlanuvchilardan biri og‘ir jarohatlar tufayli vafot etdi. Bu haqda Kyodo News nashri mahalliy politsiya ma’lumotlariga tayanib xabar berdi.
Hodisa shahar markazidagi mashhur sayyohlik hududi — Dotonbori tumanida sodir bo‘lgan. Ma’lum bo‘lishicha, hujum qilgan shaxs va o‘smirlar bir-birlarini ilgari tanigan.
Dastlab ular o‘rtasida og‘zaki tortishuv yuzaga kelgan, keyinchalik mojaro qo‘l jangiga aylanib, gumonlanuvchi pichoq ishlatgan. Natijada uch nafar o‘smir jarohatlangan.
Jabrlanganlar zudlik bilan shifoxonaga yetkazilgan, biroq ulardan biri shifokorlarning sa’y-harakatlariga qaramay, hayotdan ko‘z yumgan. Voqeani sodir etgan gumonlanuvchi hodisadan keyin qochishga uringan, ammo u Nara prefekturasida politsiya tomonidan qo‘lga olingan.
Mazkur holat yuzasidan tergov ishlari olib borilmoqda. Politsiya hodisaning sabablarini aniqlashga harakat qilmoqda.
