Germaniyada bankka beshinchi bor qaroqchilik sodir bo‘ldi

Germaniyada so‘nggi ikki oy ichida kamida beshinchi bor bankka o‘g‘irlik sodir etildi. Bu haqda Zamin.uz xabar berdi.

Bu haqda Deutsche Welle axborot berdi. Ma’lum bo‘lishicha, Bremen shahri yaqinidagi Shtur shahrida joylashgan Volksbank filialiga noma’lum shaxslar bostirib kirgan.

Ular bank binosining yerto‘lasiga deraza orqali kirib, 14 ta seyf qutisini ochib, ichini bo‘shatib ketgan. Hozircha yetkazilgan moddiy zarar miqdori aniq emas, chunki seyflardagi mablag‘ va buyumlar bank sirlari sifatida ko‘riladi.

Jinoyatchilar bank yerto‘lasiga noma’lum suyuqlik purkagan bo‘lib, bu xodimlarning sog‘lig‘iga salbiy ta’sir qilgan bo‘lishi mumkin. Ayrim xodimlarda o‘zini noqulay his qilish va ko‘ngil aynishi kabi holatlar kuzatilgan.

Voqea joyiga o‘t o‘chiruvchilar va tez tibbiy yordam guruhlari yetib kelgan. Ikki nafar xodimga tibbiy yordam ko‘rsatilgan, xavfsizlik maqsadida esa bank binosi to‘liq evakuatsiya qilingan.

Tekshiruvlar davomida havoda xavfli moddalarning yuqori miqdori aniqlanmagan. Guvohlarning aytishicha, hodisa paytida uch nafar shaxs ko‘k rangli kombinezon kiyib, bank binosidan chiqib ketgan va qora rangli avtomobil tomon yo‘l olgan.

Hozirda qaroqchilarni qidirish ishlari davom ettirilmoqda.