Navalniyning o‘limi epibatidin bilan bog‘liqmi?
Rossiyalik marhum muxolifatchi Aleksey Navalniyning oila a’zolari uning vafotidan so‘ng xorijga olib chiqilgan biologik materiallarda epibatidin moddasi aniqlanganini ma’lum qilishdi. Bu haqda Zamin.uz xabar berdi.
Ushbu moddalarni bir necha mustaqil laboratoriyalar tahlil qilib, bir xil xulosaga kelishgan. Bu haqda “The Insider” nashri xabar berdi.
Ma’lum qilinishicha, Buyuk Britaniya, Shvetsiya, Fransiya, Germaniya va Niderlandiyaning laboratoriyalari Navalniyning biologik materiallarini tekshirib, mazkur masala bo‘yicha Myunxen xavfsizlik konferensiyasida qo‘shma bayonot berishni rejalashtirmoqda. Epibatidin — kuchli neyrotoksin bo‘lib, dastlab Janubiy Amerikadagi daraxt qurbaqasi turidan ajratib olingan.
Keyinchalik bu modda sun’iy yo‘l bilan ham sintez qilingan. Epibatidin asab tizimidagi retseptorlarga ta’sir qilib, tanada uvishish, falajlik va nafas olishning to‘xtashiga olib kelishi mumkin.
“The Insider” nashriga ko‘ra, Navalniyda kuzatilgan alomatlar aynan epibatidin ta’siriga mos kelgan. Uni davolagan reanimatolog shifokor Aleksandr Polupan ham zahar ta’sirining ochiq manbalardagi belgilar bilan mosligini tasdiqlagan.
2025 yil sentyabr oyida Yuliya Navalnaya, erining o‘limidan so‘ng, uning jamoasi tomonidan yig‘ilgan biologik material namunalarini xorijiy laboratoriyalarga yuborganini ma’lum qildi. Mustaqil laboratoriyalar ushbu namunalarda zaharlanish ehtimolini tasdiqlashgan.
Yuliya Navalnaya o‘z bayonotida erining zaharlangani bo‘yicha aniq dalillar mavjudligini ta’kidlab, aybdorlarni javobgarlikka tortishni talab qildi.
