Londonda Ramazon sharafiga ko‘cha chiroyli yoritildi

Angliya poytaxti Londondagi mashhur Coventry Street bu yil Ramazon oyi munosabati bilan bayramona yoritildi. Bu haqda Zamin.uz xabar berdi.

Bu haqda London meri Sodiq Xon o‘zining ijtimoiy tarmoqlardagi sahifasida ma’lum qildi. Ramazon oyi sharafiga ko‘chani yoritish ishlari “Aziz” jamg‘armasi va London munitsipaliteti hamkorligida amalga oshirildi.

Mazkur ko‘cha Piccadilly Circusdan Leicester Squaregacha cho‘zilgan bo‘lib, kechqurun yanada chiroyli ko‘rinishga ega bo‘ldi. Bu yilgi bezaklar geometrik yorug‘lik naqshlari asosida tayyorlanib, piyodalar yo‘lagi ustida “Ramazon muborak!” yozuvi aks ettirilgan yorug‘lik installyatsiyasi o‘rnatildi.

Buning uchun 31 mingdan ortiq LED chiroqlar ishlatilgani qayd etildi. Yoritish ishlari har kuni mahalliy vaqt bilan soat 17:00 dan 01:00 gacha davom etadi va 19 martgacha davom etishi rejalashtirilgan.

Bu tashabbus nafaqat musulmonlar, balki Londonning barcha aholisi va mehmonlari uchun Ramazon kayfiyatini his qilish imkonini yaratmoqda. Yoritish marosimida London meri Sodiq Xon jamg‘arma vakili bilan birga chiroqlarni ramziy tarzda yoqdi.

Merning so‘zlariga ko‘ra, London G‘arb dunyosida Ramazon oyi sharafiga markaziy ko‘chasi maxsus bezatiladigan ilk shaharlar qatoriga kiradi. U Ramazon oyini turli millat va din vakillarini birlashtiradigan, o‘zaro hurmat va birdamlikni mustahkamlaydigan davr sifatida ta’kidladi.

2023 yilda boshlangan ushbu tashabbus bugun Londonning muhim Ramazon an’analaridan biriga aylangan.